Ўзбекистон Республикаси Энергетика вазирлиги

«Ўзбекэнерготаъмир» АЖ ҳамда Республика касбий кўникмалар маркази ўртасида ишлаб чиқариш соҳаларини ёшлар ўртасида кенг тарғиб қилиш мақсадида ўзаро ҳамкорлик меморандуми имзоланди.

Мазкур ҳужжатга кўра, энергетика тизимида меҳнат фаолиятини давом эттириш истагида бўлган таълим олувчилар соҳага оид назарий билимларни касбий кўникмалар марказларида, амалий жиҳатдан эса бевосита ишлаб чиқариш корхоналарида ўрганиш имкониятига эга бўладилар.

Касбий кўникмалар марказлари билан ҳамкорликда дуал таълим тизимини энерготаъмир соҳасига жорий этиш — малакали кадрлар тайёрлашнинг энг истиқболли йўналишларидан биридир. Ушбу тизим ёш мутахассисларга келажакдаги иш жойида ҳақиқий ишлаб чиқариш тажрибасини орттириш, корхоналарга эса ўз ишига садоқатли, касбий жиҳатдан тайёр ходимларни танлаб олиш имконини яратади. Натижада, энергетика соҳасидаги таъмирлаш ишларининг самарадорлиги ва сифати янада ошади.

Дуал таълим тизимининг жорий этилиши ёшларни ишлаб чиқариш муҳитига тез мослашишига, корхонанинг ўзига хос иш жараёнлари, техникаси ва корпоратив маданиятини чуқур ўзлаштиришига хизмат қилади.

Шунингдек, таълим олувчилар малакали усталар (устоз-тренерлар) раҳбарлигида, амалиёт ўтиш учун махсус жиҳозланган ўқув майдончаларида ҳақиқий таъмирлаш жараёнларида иштирок этадилар. Бу эса уларнинг назарий билимларини амалий кўникмаларга айлантириш имконини беради.

Корхона ўз навбатида ўқув дастурларини шакллантиришда фаол иштирок этиб, таълим мазмунининг энерготаъмир тизимига зарур бўлган амалий талаб ва стандартларга мос келишини таъминлайди. Талабаларнинг амалий кўникмалар кундаликлари ҳамда ўқув жараёнидаги ютуқлари марказ ва корхона мутахассислари томонидан мунтазам назорат қилинади.

ТДТУ ва бир қатор энергетика корхоналарида дуал таълим тизими жорий қилинган.