Ózbekstan -Tájikstan: kóp ásirlik doslıq, jaqsı qońsıshılıq hám óz-ara qatnasıqlardı bekkemlewde jáne bir áhmiyetli qádem

Tájikstan jetekshisin “Tashkent-Xumo” xalıqaralıq aeroportında mámleketimiz basshısı kútip aldı. Joqarı mártebeli miyman húrmetine eki eldiń mámleketlik bayraqları kóterildi hám húrmetli qarawıl sap tarttı.

Ózbekstan hám Tájikstan xalıqları tek qońsı emes, al ásirler dawamında tuwısqan bolıp, bir bulaqtan suw iship, bir hawadan nápes alıp, bir aspan astında dóretiwshilik jumısları menen shuǵıllanıp kelgen, birgelikte iyinles turıp, qıyınshılıqlardı jeńip ótken. Bir din, uqsas mádeniyat, úrp-ádet hám dástúrler bir-biri menen bekkem baylanıstırıp turadı.

Prezidentlerdiń siyasiy erk-ıqrarı hám uzaqtı gózlep júrgizip atırǵan aqılǵa uǵras siyasatı sebepli sońǵı jıllarda mámleketlerimizdiń kóp táreplemeli birge islesiwi jańa basqıshqa kóterildi, xalıqlarımızdıń doslıǵı bekkemlendi.

Joqarı mártebeli miyman “Jańa Ózbekstan” parkine barıp, Ǵárezsizlik monumentine gúl qoydı.

Ilim-máripatı, múnásip ámelleri menen milletleraralıq qatnasıqlardı joqarı dárejede qádirlegen ata-babalarımızdıń miyrası bárqulla dúnya jámiyetshiliginiń itibarında.

“Jańa Ózbekstan” parkiniń Ǵárezsizlik monumentinde sáwlelengen ullılar tımsalı búgin bárshemizge maqtanısh baǵıshlaydı. Mámleketimizdiń ótmishi hám keleshegin sáwlelendiredi.

Tájikstan Respublikası Prezidenti Emomali Rahmon Ǵárezsizlik monumentine gúl qoyar eken, Watan azatlıǵınıń, el abadanlıǵınıń ayqın kórinisi sıpatında maqtanıshlı boy tiklegen kompleks aldında simvolikalıq túrde bas iydi.

Dúnya civilizaciyasına awızbirshilik penen úles qosıwdı jırlaǵan ata-babalarımızdıń aǵartıwshılıǵın tán alıp, húrmet kórsetti.

Kóksaray rezidenciyasında elimizge mámleketlik sapar menen kelgen Tájikstan Respublikası Prezidenti Emomali Rahmondı saltanatlı kútip alıw máresimi bolıp ótti.

Prezident Shavkat Mirziyoev joqarı mártebeli miymandı qızǵın qutlıqlap, minberge mirát etti.

Eki eldiń mámleketlik bayraqları kóterildi hám húrmetli qarawıl sap tarttı. Áskeriy orkestrdiń atqarıwında Ózbekstan hám Tájikstan gimnleri jańladı.

Jetekshiler húrmetli qarawıl qatarı aldınan ótip, rásmiy delegaciyalar aǵzaların qutlıqladı.

Bunnan soń Ózbekstan Respublikası Prezidenti Shavkat Mirziyoev hám Tájikstan Respublikası Prezidenti Emomali Rahmon tar sheńberde sóylesiw hám Joqarı mámleketleraralıq keńestiń birinshi májilisin ótkerdi.

Mámleketimiz basshısı Tájikstan Prezidentiniń bul mámleketlik saparı tariyxıy áhmiyetke iye bolıp, eki mámleket arasındaǵı kóp ásirlik doslıq, jaqsı qońsıshılıq hám óz-ara húrmet baylanısların bekkemlewde jáne bir áhmiyetli qádem ekenin ayrıqsha atap ótti.

– Biz Joqarı mámleketleraralıq keńestiń birinshi májilisin baslap bermektemiz. Bul format, sózsiz, eki tárepleme birge islesiwdi sapa jaǵınan jańa basqıshqa kóteredi, Ózbekstan – Tájikstan strategiyalıq sheriklik hám awqamlaslıq qatnasıqların ámeliy mazmun hám aldıńǵı baslamalar menen bayıtıwǵa xızmet etedi, – dedi Shavkat Mirziyoev.

Húkimetler, parlamentler hám uyımlar dárejesindegi jedel hám tıǵız baylanıslar qanaatlanıwshılıq penen atap ótildi.

Saparǵa tayarlıq sheńberinde Húkimetleraralıq komissiya májilisi, sanaat kórgizbesi hám aymaqlar, rektorlar, ilimpazlar, jaslar hám tallaw oraylarınıń forumları tabıslı shólkemlestirildi. Házirgi waqıtta mámleketimizde Tájikstan mádeniyatı hám kinosı kúnleri ótkerilmekte.

Májiliste tárepler birge islesiwdiń jańa baǵdarların tolıq dodalap, iske qosılmaǵan imkaniyatlardan paydalanıw jolların talladı hám óz-ara paydalı Ózbekstan – Tájikstan birge islesiwin bekkemlewge úlken pát baǵıshlaytuǵın bir qatar áhmiyetli qararlardı qabıl etti.

Óz-ara sawda kólemin arttırıw, sanaat kooperaciyasın xoshametlew, transport tarawında óz-ara baylanıslılıqtı bekkemlew, suw hám energetika qáwipsizligin kúsheytiw ilajlarına ayrıqsha itibar qaratıldı.

Ótken jılı tovar almasıw kólemi, bárinen burın, tayar ónimlerdi óz-ara jetkerip beriw esabınan derlik 1 milliard dollarǵa jetti.

Sanaat, qurılıs, awıl xojalıǵı, toqımashılıq, elektrotexnika, farmacevtika hám basqa da kóplegen tarawlarda bir qatar kooperaciyalıq joybarlar tabıslı ámelge asırılmaqta.

Búgingi kúnde eki mámleket paytaxtları arasında aviareysler, avtobus hám poezd qatnawları jolǵa qoyılǵan. Júk tasıw kólemi jedel ósip barmaqta.

2028-jılǵa barıp, óz-ara sawdanı 2 milliard dollarǵa jetkeriw imkaniyatları kórip shıǵıldı.

“Oybek – Fotihobod” shegaraaldı sawda zonasın qurıwdı jedellestiriw, ónimlerdi sertifikatlaw hám “E-Permit” ruqsatnamalardı almastırıw sanlı sistemaların jolǵa qoyıw, shegara qadaǵalaw punktlerin modernizaciyalaw boyınsha erisilgen kelisimler bul shekke erisiwge xızmet etedi.

Bunnan tısqarı, taw-kán, energetika, awıl xojalıǵı, elektrotexnika, jeńil sanaat, qurılıs hám basqa da tarawlardaǵı joybarlardı óz ishine alǵan ayrıqsha Sanaat kooperaciyası baǵdarlaması qabıl etilmekte.

Perspektivalı joybarlardı qollap-quwatlaw ushın birgeliktegi Investiciyalıq kompaniyanıń kapitalın keńeytiw áhmiyetli ekenligi atap ótildi.

Energetika, suw resursların basqarıw, transport hám basqa da kóplegen tarawlardaǵı sheriklik hár tárepleme kórip shıǵılıp, birge islesiw perspektivaları belgilep alındı.

Jetekshiler aymaqlararalıq baylanıslardı bunnan bılay da rawajlandırıw, gumanitarlıq, bilimlendiriw hám ilimiy almasıwlardı xoshametlewge kelisip aldı.

Iri diasporalardıń bar ekenligin esapqa alıp, mádeniy-gumanitarlıq baylanıslardı bekkemlew boyınsha bes jıllıq ilajlar rejesin qabıl etiw usınıs etildi.

Mámleket basshıları regionallıq kún tártibi hám xalıqaralıq siyasattıń áhmiyetli máseleleri boyınsha pikir alıstı.

Oraylıq Aziyada kóp tárepleme strukturalar hám regionallıq formatlar sheńberinde tıǵız sóylesiw hám óz-ara qollap-quwatlawdı dawam ettiriw áhmiyetli ekenligi atap ótildi. Qáwipsizlik tarawındaǵı birge islesiwdi jedellestiriw boyınsha kelisimge erisildi.

Májiliste Húkimetleraralıq komissiyanıń járdemshi baslıqları – eki mámleket Bas ministrleriniń birge islesiwdiń tiykarǵı baǵdarları boyınsha esapları tıńlandı.

Juwmaǵında erisilgen kelisimlerdiń tolıq ámelge asırılıwın támiyinlew ushın keń kólemli “jol kartası” qabıl etiletuǵını belgilendi.

Joqarı mámleketleraralıq keńestiń birinshi májilisinen soń Ózbekstan Respublikası Prezidenti Shavkat Mirziyoev hám Tájikstan Respublikası Prezidenti Emomali Rahmon iri kooperaciyalıq joybarlardı iske qosıw máresiminde qatnastı.

Mámleket basshıları 10 birgeliktegi joybardı baslap berdi.

Olar sheńberinde Tájikstanda mebel hám bılǵarı ónimleri kárxanaların shólkemlestiriw, turmıslıq texnika islep shıǵarıwdı keńeytiw, toqımashılıq quwatlıqların qurıw, Tashkentte turaq jay kompleksi hám sawda obektlerin qurıw jáne Ferǵana wálayatında konserva ónimlerin islep shıǵarıwdı jolǵa qoyıw názerde tutılǵan.

Bunnan tısqarı, Ándijan wálayatında sút ónimlerin, Surxandárya wálayatında bolsa miywe sherbetleri hám metall briketler islep shıǵarıw quwatlıqları iske qosıldı.

Sonday-aq, Jańa Tashkenttegi kóshelerden birine Dushanbe qalasınıń atın beriwge baǵıshlanǵan saltanatlı máresim bolıp ótti.

Ózbekstan hám Tájikstan Prezidentleri usınıs etilgen joybarlardıń ámelge asırılıwı eki mámleket arasındaǵı sawda-ekonomikalıq birge islesiwdi bunnan bılay da keńeytiwge kúshli pát baǵıshlaytuǵınına isenim bildirdi.

Ózbekstan – Tájikstan Joqarı mámleketleraralıq keńesiniń birinshi májilisinen soń eki tárepleme hújjetlerge qol qoyıw hám almasıw máresimi boldı.

Ózbekstan Respublikası Prezidenti Shavkat Mirziyoev hám Tájikstan Respublikası Prezidenti Emomali Rahmon Strategiyalıq sheriklik hám awqamlaslıq qatnasıqların keńeytiw haqqında birgeliktegi bildiriwge qol qoydı.

Bunnan tısqarı, húkimetler, ministrlikler hám uyımlar dárejesinde kóp táreplemeli birge islesiwdi bunnan bılay da keńeytiwge qaratılǵan hújjetler toplamı, sonıń ishinde:

– Tovar almasıwdı arttırıw baǵdarlaması;
– Sanaat kooperaciyası baǵdarlaması;
– Tovarlardıń kelip shıǵıwın sertifikatlastırıw elektron sistemaların óz-ara qollanıw haqqında kelisim;
– Densawlıqtı saqlaw tarawındaǵı birge islesiw haqqında kelisim;
– Shegara aldı aymaqlarda radiochastotalardı ózlestiriwdi muwapıqlastırıw haqqında kelisim;
– “Ózbekstan – Tájikstan investiciyalıq kompaniyası”n shólkemlestiriw haqqındaǵı húkimetleraralıq kelisimge ózgerisler kirgiziw haqqında protokol;
– “E-Permit” málimleme sistemasınan paydalanıw boyınsha birge islesiw haqqında kelisim;
– Ilimler akademiyaları arasındaǵı ilimiy birge islesiw haqqında kelisim;
– 2026-2028-jıllarda sanaat hám innovaciyalar tarawındaǵı ilajlardı ámelge asırıw rejesi;
– 2026-2028-jıllarda taw-kán sanaatı hám jańa texnologiyalar tarawındaǵı ilajlardı ámelge asırıw rejesi;
– 2026-2027-jıllarda mádeniyat tarawında birge islesiw boyınsha ilajlar rejesi;
– 2026-2028-jıllarda turizm tarawındaǵı birge islesiwdi rawajlandırıw boyınsha “jol kartası”;
– 2026-2028-jıllarda agrosanaat kompleksinde birge islesiwdi bunnan bılay da rawajlandırıw boyınsha “jol kartası”;
– innovaciya, mámleketlik xızmet, qarjı, bilimlendiriw hám sud qararların májbúriy orınlaw tarawlarında birge islesiw haqqındaǵı memorandumlarǵa qol qoyıldı.

Ózbekstan Respublikası Prezidenti Shavkat Mirziyoev hám Tájikstan Respublikası Prezidenti Emomali Rahmon Kóksaray rezidenciyasında ǵalaba xabar qurallarınıń wákilleri menen bolıp ótken ushırasıwda Joqarı mámleketleraralıq keńestiń birinshi májilisiniń juwmaqları boyınsha pikir alıstı.

Mámleketimiz jetekshisi Ózbekstan dos Tájikstannıń turaqlı ekonomikalıq ósiwdi támiyinlew, investiciyalardı tartıw, inflyaciyanı jılawlaw hám xalıqtıń real dáramatların arttırıw baǵdarında erisip atırǵan joqarı nátiyjelerinen shın júrekten quwanıshlı ekenin atap ótti.

Tájikstan Ózbekstan ushın isenimli strategiyalıq sherik hám awqamlas bolıp esaplanadı. Mámleketlerimizdiń maqsetleri, kózqarasları hám umtılısları birdey ekeni, eki tárepleme qatnasıqlar siyasiy, ekonomikalıq hám gumanitarlıq tarawlarda jedel rawajlanıp atırǵanı atap ótildi.

Parlamentler hám húkimetler, aymaqlardıń basshıları hám zıyalılar dárejesinde turaqlı ushırasıwlar ótkerilip atırǵanı qanaatlanıwshılıq penen atap ótildi.

Ótken jılı eki mámleket arasındaǵı tovar almasıwdıń kólemi derlik bir milliard dollarǵa jetti. Sanaat kooperaciyası jedel rawajlanbaqta. Házirgi waqıtta mámleketimizde 500 den aslam birgeliktegi kárxana jumıs alıp barmaqta.

Transport tarawındaǵı birge islesiw keńeyip barmaqta. Paytaxtlar arasında háptesine on aviareys ámelge asırılmaqta.

Ózbekstan Prezidenti búgingi sammitke qatań tayarlıq kórilgenin málim etti.

Húkimetleraralıq komissiya májilisleri, aymaqlar, rektorlar, ilimpazlar, jaslar, tallaw oraylarınıń forumları, Tájikstan mádeniyatı hám kinosı kúnleri, basqa da bir qatar áhmiyetli ilajlar tabıslı ótkerildi.

Bolıp ótken nátiyjeli sóylesiwler hám Mámleketleraralıq keńestiń birinshi májilisi dawamında máselelerdiń keń sheńberi dodalandı, kóp táreplemeli birge islesiwdi rawajlandırıwdıń tiykarǵı baǵdarları hám maqsetleri belgilep alındı.

Barlıq dárejelerde jedel baylanıslardı dawam ettiriw, xalıqaralıq hám regionallıq strukturalar, sonıń ishinde, Másláhát ushırasıwları hám “Oraylıq Aziya plyus” formatları sheńberinde sóylesiwdi bekkemlew zárúr ekenligi atap ótildi.

Ekonomikalıq birge islesiwdi rawajlandırıw zárúrligi atap ótildi. Eki mámleket húkimetlerine ayrıqsha baǵdarlama tiykarında tovar almasıwdı eki milliard dollarǵa jetkeriw boyınsha ámeliy ilajlar kóriw tapsırıldı.

Usı maqsette “Oybek – Fotihobod” sawda zonasın shólkemlestiriw jedellestiriledi, energetika, geologiya, metallurgiya, toqımashılıq, awıl xojalıǵı, farmacevtika hám basqa da tarawlarda eki milliard dollarlıq baslamalardı óz ishine alǵan Kooperaciya baǵdarlaması ámelge asırıladı.

Tárepler bul joybarlardı alǵa qoyıw ushın Birgeliktegi investiciyalıq kompaniyanıń potencialınan belsene paydalanıwǵa kelisip aldı.

Transport hám tranzit tarawına ayrıqsha itibar qaratıldı. Júk tasıwda elektron ruqsatnama beriw sistemasın engiziw haqqında kelisimge qol qoyıldı, sonday-aq, hawa hám temir jol transportı qatnawların keńeytiw hám shegara ótkeriw punktleriniń quwatlılıǵın arttırıw boyınsha kelisimlerge erisildi.

Bul óz-ara muwapıqlastırılǵan ilajlardıń tiykarǵı maqseti – biznes hám puqaralar ushın qolaylı sharayatlar jaratıw jáne sawda-ekonomikalıq birge islesiwdi keńeytiw drayveri sıpatında aymaqlardıń potencialın iske qosıw.

Suw hám energetika tarawlarındaǵı birge islesiw eki mámleket baylanıslarınıń áhmiyetli baǵdarı bolıp esaplanadı.

“Jasıl” energetika tarawında iri joybarlardı birgelikte alǵa qoyıw jáne suw bólistiriw, suw obektlerin avtomatlastırıw hám sanlastırıw máselelerin muwapıqlastırıwǵa tayarlıq tastıyıqlandı.

Mádeniy-gumanitarlıq baylanıslar xalıqlarımız arasındaǵı bekkem doslıq kópiri bolıp qalmaqta. Birge islesiw sheńberinde Abdurahmon Jomiy hám Áliysher Nawayı doslıǵı haqqında film tayarlandı, Jańa Tashkenttegi kóshelerden birine bolsa Dushanbe qalasınıń atı berildi.

Jıllıq kalendar tiykarında bilimlendiriw, turizm hám jaslar baǵdarlarında jedel almasıwlardı dawam ettiriw niyeti bildirildi.

Eki mámlekettegi iri ózbek hám tájik diasporaların qollap-quwatlaw, mádeniy oraylardı keńnen rawajlandırıw, ana tili, dástúr hám úrp-ádetlerdi qásterlep saqlaw maqsetinde Mádeniy-gumanitarlıq tarawda birge islesiw boyınsha kompleksli baǵdarlama tayarlanadı.

Juwmaǵında bul tariyxıy sapar nátiyjeleri awqamlaslıq qatnasıqların jáne de bekkemlep, dos mámleketlerimizdiń turaqlı rawajlanıwına hár tárepleme xızmet etetuǵını atap ótildi.

Tájikstan Respublikası Prezidentiniń mámleketlik saparı sheńberinde usı mámlekettiń Tashkent qalasındaǵı elshixanasınıń jańa imaratınıń ashılıwına baǵıshlanǵan saltanatlı máresim bolıp ótti.

Prezidentler Shavkat Mirziyoev hám Emomali Rahmon rámziy lentanı kesip, diplomatiyalıq wákilxananıń jańa imaratın saltanatlı túrde ashtı.

Jetekshiler elshixana hám konsullıq bóliminiń hákimshilik imaratları, elshixana, diplomatlar hám olardıń shańaraq aǵzaları ushın turaq jaylardı óz ishine alǵan kompleksti kózden ótkerdi.

Máresim juwmaǵında Prezidentler Húrmetli miymanlar kitabına pikir jazıp, diplomatiyalıq wákilxana aymaǵına terek ekti.

Bul ilaj Ózbekstan menen Tájikstan arasındaǵı doslıq, jaqsı qońsıshılıq, strategiyalıq sheriklik hám awqamlaslıq qatnasıqların bunnan bılay da bekkemlewge bolǵan óz-ara umtılıs isenimli ekenin jáne bir márte tastıyıqladı.

Ózbekstan Respublikası Prezidenti Shavkat Mirziyoev hám Tájikstan Respublikası Prezidenti Emomali Rahmon “Ózbekstan” xalıqaralıq forumlar sarayında eki mámleket kórkem óner sheberleriniń qatnasıwındaǵı dástúriy koncertti birgelikte tamashaladı.

Ózbekstan hám Tájikstan xalıqların uzaq ótmishke barıp taqalatuǵın qatnasıqlar, uqsas ruwxıy hám diniy qádiriyatlar, dástúrler jáne bay mádeniy miyras baylanıstırıp turadı.

Eki mámlekette de ásirler dawamında qáliplesip kelgen doslıq, óz-ara húrmet hám jaqsı qońsıshılıq dástúrleri qásterlep saqlanıp, bayıp barmaqta.

Bul mádeniy ilaj bunıń ayqın dálili boldı. Koncert baǵdarlamasında dos xalıqlarımızdıń biytákirar hám bay mádeniyatın sáwlelendiretuǵın milliy muzıka hám saxna kórkem óneriniń eń saylandı shıǵarmaları atqarıldı.

Ózbekstan hám Tájikstan kórkem óner sheberleri hám ansamblleriniń birgeliktegi shıǵıwları óz-ara kelisim, ruwxıy jaqınlıq hám jedel mádeniy sóylesiwdiń belgisi boldı.

Tájikstan Respublikası Prezidenti Emomali Rahmonnıń Ózbekstanǵa mámleketlik saparı dawam etpekte.