O‘zbekiston Respublikasi Turizm qo‘mitasi

Uchinchi kun sessiyalari mehmonxona va restoran sohasi uchun mutaxassislarni tayyorlash hamda ularning malakasini oshirish bilan bog‘liq muhim masalalarni qamrab oldi. Ishtirokchilar turizmning barqaror rivojlanishi uchun ta’limning ahamiyati, o‘quv standartlarini takomillashtirish, nazariya va amaliyotni uyg‘unlashtiruvchi dual ta’lim tizimini joriy etish kabi mavzularni muhokama qildilar. Xizmat ko‘rsatishning xalqaro me’yorlariga mos keladigan kasbiy mahoratni shakllantirishga alohida e’tibor qaratildi.

Muhokamalarda Turizm qo‘mitasi, O‘zbekiston mehmonxonalar uyushmasi, xalqaro universitetlar va sohaga oid o‘quv muassasalari vakillari ishtirok etdilar. Ishtirokchilar mutaxassislar malakasini oshirish va turizmda dual ta’limni rivojlantirishga qaratilgan zamonaviy ta’lim yondashuvlarini joriy etish tajribasi haqida fikr almashdilar. So‘zga chiqqanlar ta’kidlaganlaridek, kadrlar tayyorlashning samarali tizimi milliy turizm sohasining raqobatbardoshligini mustahkamlash uchun asos bo‘lib xizmat qiladi.

Xulosa qilib aytganda, ishtirokchilar O‘zbekistonda turizm va mehmondo‘stlik sohasini yanada rivojlantirish uchun ta’lim, tadbirkorlik va davlat o‘rtasidagi hamkorlikning muhimligini alohida ta’kidlab o‘tdilar.

HoReCa Expo Uzbekistan 2025 uchinchi kunida kadrlar salohiyatini oshirish hamda turizm va mehmondo‘stlik sohasida xalqaro aloqalarni mustahkamlashga qaratilgan bir qator hamkorlik memorandumlari imzolandi.

"HoReCa Expo Uzbekistan 2025" so‘nggi kunida taqdim etilgan ta’lim tashabbuslari mamlakatning barqaror va innovatsion turizm muhitini shakllantirishga ko‘maklashadigan zamonaviy kasbiy rivojlanish ekotizimini yaratishga bo‘lgan intilishini yaqqol namoyon etdi.