O‘zbekiston Respublikasi Turizm qo‘mitasi

Tadbir davomida o‘quv dasturlari natijalari, o‘rganilgan ilg‘or xorijiy tajribalar va ularni O‘zbekiston amaliyotiga tatbiq etish imkoniyatlari muhokama qilindi.

Seminarda “Markaziy Osiyoda turizmni rivojlantirish siyosati” dasturi doirasida Yaponiyada amalga oshirilgan amaliy ishlar — turizm infratuzilmasi, sog‘lomlashtirish yo‘nalishlari, yo‘l ko‘rsatkich belgilari, turizm axborot markazlari hamda hududlarda DMO (Destination Management Organization) tizimi faoliyati haqida taqdimot o‘tkazildi.

Shuningdek, Yaponiya hukumati tomonidan turizmni boshqarishda nodavlat notijorat tashkilotlarning ishtiroki, mahalliy jamoalarning hamkorligi va turistik brendlarni yaratishdagi tajribalarga alohida e’tibor qaratildi.

Treningning ikkinchi bosqichi Malayziyada “Musulmon mehmondo‘stlik xizmatlarini rivojlantirish” mavzusida o‘tkazildi. Dastur doirasida Musulmon-mehmondoʻstlik xizmatlarini tashkil etish, xizmat koʻrsatish sohasida Malayziyada amalga oshirilgan islohotlar, turizm sohasida halol mahsulot va xizmatlarni joriy etish, davlat tashkilotlarining mazkur yoʻnalishdagi hamkorligi bo‘yicha ilg‘or tajribalar o‘rganildi.

Qoʻmita xodimlari oʻquv seminar-trening davomida Kuala-Lumpur shahridagi Islom sanʼati muzeyi, Putrajaya shahri, Gopeng Perak Glamping sayyohlik maskani, Malayziya standartlar instituti, Malayziya Kimyo boshqarmasi kabi tashkilotlarga tashrif buyurgan holda mavzuga doir amaliy tajribalar bilan tanishdilar.

Trening yakunida ishtirokchilar tomonidan O‘zbekistonning turizm salohiyati, musulmon mehmondo‘stlik xizmatlarini rivojlantirish yo‘nalishida amalga oshirilgan ishlar hamda sohadagi mavjud muammolar va yechimlar yuzasidan taqdimot o‘tkazildi.

Mazkur xalqaro o‘quv dasturi O‘zbekiston mutaxassislari uchun Yaponiyaning barqaror turizm modeli va Malayziyaning musulmon mehmondo‘stlik tajribasini o‘rganish orqali milliy turizm siyosati va xizmatlarini rivojlantirishda yangi bosqichni boshlash imkonini berdi.