O‘zbekiston Respublikasi Turizm qo‘mitasi

Mazkur ixtisoslashtirilgan xalqaro ko‘rgazma turli mamlakatlardan mehmonxona va restoran biznesi vakillari, jihozlar va texnologiyalar yetkazib beruvchilar, dizaynerlar, arxitektorlar, investorlar hamda mutaxassislarni birlashtiradi. Tadbir HoReCa sohasidagi asosiy yo‘nalishlarni, jumladan raqamlashtirish, barqaror rivojlanish, kelajak xizmatlari, restoran franshizalari va gastronomik turizmni muhokama qilish uchun markaziy maydon vazifasini o‘taydi.

Ko‘rgazma doirasida o‘tkaziladigan “Xizmat va qulaylikka Investitsiyalar: HoReCa uchun biznes yechimlari” konferensiyasida mehmonxona va restoran biznesidagi zamonaviy tendensiyalar hamda innovatsiyalarga bag‘ishlangan bir qator muhim sessiyalar bo‘lib o‘tadi.

Mavzular qatorida barqarorlik va texnologiyalarga urg‘u berilgan holda mehmonxonalar arxitekturasi va dizaynining kelajagi, mehmonlar qulayligini oshirish uchun raqamli yechimlar, xizmat ko‘rsatish va qulaylikka yo‘naltirilgan sarmoyalar, shuningdek, texnologiyalarning HoReCa rivojlanishiga ta’siri kabi masalalar muhokama qilinadi. Franchayzing, yangi bozorlarga kirib borish, mintaqaviy rivojlanishning harakatlantiruvchi kuchi sifatida gastroturizm va restoran biznesining zamonaviy tendensiyalariga alohida e’tibor qaratiladi.

Ko‘rgazmaning eng muhim tadbirlaridan biri 22 oktyabr kuni o‘tkaziladigan “Gastro Forum 2025” xalqaro gastronomiya forumi bo‘ladi. Forum restoratorlar, oshpazlar, oziq-ovqat ishlab chiqaruvchilari, gastronomiya ekspertlari va turizm sohasi vakillarini bir joyga to‘playdi. Unda gastronomiyaning hududlar va umuman mamlakatni targ‘ib qilishdagi muhim vosita sifatidagi roli muhokama qilinadi.

“HoReCa Expo Uzbekistan 2025” va “Gastro Forum 2025” tajriba almashish, ishbilarmonlik aloqalarini o‘rnatish, yangi yechimlarni taqdim etish va muvaffaqiyatli amaliyotlarni o‘rganish uchun noyob imkoniyat yaratadi. Ishtirokchilar restoran va mehmonxona jihozlari, avtomatlashtirish texnologiyalari, dizayn sohasidagi eng so‘nggi ishlanmalar bilan tanishish imkoniyatiga ega bo‘ladilar. Shuningdek, gastronomik turizmni rivojlantirish istiqbollari va o‘zbek oshxonasining eksport salohiyatini muhokama qilish imkoniyati ham yaratiladi.

Soha mutaxassislari uchun bu nafaqat keng ko‘lamli ko‘rgazma, balki hamkorlik aloqalarini o‘rnatishdan tortib xalqaro bozorlarga chiqishgacha bo‘lgan strategik rivojlanish platformasidir.

Ishtirok etish va batafsil ma’lumot olish uchun ko‘rgazmaning rasmiy veb-saytiga tashrif buyurish tavsiya etiladi.

Tadbir Turizm qo‘mitasi va O‘zbekiston mehmonxonalar uyushmasi hamkorligida tashkil etilmoqda.