Aydarko‘lda OAV vakillari uchun press-tur tashkil etildi
2025-09-28 11:50:00 / Yangiliklar
Press-tur ishtirokchilariga Aydarko‘lda sayyohlar uchun yaratilgan shart-sharoitlar – oilaviy mehmon uylari, o‘tov oromgohlari, ov va sayr xizmatlari, shuningdek, 3 ming nafar sayyohga bir vaqtning o‘zida xizmat ko‘rsata oladigan obyektlar namoyish etildi. Shuningdek, jurnalistlar qushlarni kuzatish, baliq ovlash va cho‘ldagi sayohat xizmatlari bilan ham tanishdilar.
Tashrif davomida “Qizilqum Safari” va “Sputnik Navoiy” MCHJlari faoliyati ham taqdim etildi. Ularga “Turizm klasteri” maqomi berilgan bo‘lib, bu yirik loyihalar orqali hududda yangi ish o‘rinlari yaratish va turizmni yanada rivojlantirish ko‘zda tutilgan. Shuningdek, press-tur ishtirokchilariga Aydarko‘lda amalga oshirilishi rejalashtirilgan yirik loyihalar – kapsula uylari, modulli mehmonxonalar va madaniy meros obyektlaridan samarali foydalanish ishlari haqida ham ma’lumot berildi.
Aydarko‘lda tashkil etilgan press-tur mahalliy va xorijiy OAV orqali hududning turistik salohiyatini keng targ‘ib qilish, sayyohlar oqimini ko‘paytirish va mintaqa nufuzini oshirishda muhim ahamiyat kasb etadi.