O‘zbekiston va Fransiya poytaxtlari turizm sohasidagi hamkorlik masalalarini muhokama qildilar
2025-09-26 11:25:00 / Yangiliklar
Parijda bo‘lib o‘tayotgan Yevropaning eng yirik xalqaro sayyohlik ko‘rgazmalaridan biri – “IFTM Top Resa” doirasida Toshkent shahar hokimligi delegatsiyasi Parij shahri Turizm departamenti vakillari bilan muzokaralar olib bordi.
Uchrashuvda tomonlar o‘zaro hamkorlik aloqalarini yanada rivojlantirish, turizm sohasida tajriba almashish hamda qo‘shma loyihalarni amalga oshirish imkoniyatlarini atroflicha muhokama qildilar.
Muzokaralar chog‘ida Parij shahrida o‘tkazilishi rejalashtirilayotgan gastronomik festival masalasi alohida kun tartibida ko‘rib chiqildi. Festivalning asosiy maqsadi – o‘zbek milliy taomlarini xalqaro miqyosda keng targ‘ib etish, shuningdek, mamlakatimizning boy madaniy merosini Fransiya va boshqa xorijiy auditoriyaga yetkazishdan iborat.
Mazkur tashabbus O‘zbekistonning xalqaro turizm bozori va gastronomik xaritasidagi mavqeini mustahkamlashga, shuningdek, ikki tomonlama hamkorlikni yanada chuqurlashtirishga xizmat qiladi.