Turizm qo‘mitasining stendi Eco Expo Central Asia ko‘rgazmasida eng interaktiv deb topildi
2025-06-22 07:05:00 / Yangiliklar
19–21-iyun kunlari poytaxtdagi Central Asian Expo (CAEx) ko‘rgazma majmuasida bo‘lib o‘tgan Eco Expo Central Asia 2025 xalqaro ekologik texnologiyalar ko‘rgazmasida Turizm qo‘mitasining stendi taqdimotlar, mahorat darslari, interfaol ekspozitsiyalar hamda an’anaviy madaniy unsurlarni zamonaviy ekologik innovatsiyalar bilan uyg‘unlashtirgani uchun “Eng interaktiv pavilon” nominatsiyasi bo‘yicha mukofotga sazovor bo‘ldi. Ushbu yutuq O‘zbekistonda barqaror turizmning ekologik transformatsiya jarayonidagi muhim drayver sifatidagi ahamiyatini yana bir bor tasdiqladi.
Milliy an’analar va zamonaviy texnologiyalarga asoslangan ekologik turizm sohasidagi yutuqlarni namoyish etgan ekspozitsiya 2000 ga yaqin tashrif buyuruvchini o‘ziga jalb etdi. Virtual ekomarshrutlar, kulolchilik va gilam to‘qish bo‘yicha mahorat darslari tashrif buyuruvchilarga mintaqa madaniy merosiga yanada chuqurroq sho‘ng‘ish imkonini yaratdi.
Stendda yetakchi universitetlar va tashkilotlar ishtirokida ekspert sessiyalari ham o‘tkazildi. Ularda turizmni raqamlashtirish, ekologik standartlarni joriy etish hamda mahalliy hamjamiyatlar rivoji kabi dolzarb masalalar muhokama qilindi.
Turizm qo‘mitasining stendi nafaqat innovatsiyalar namoyish etilgan maydon, balki tajriba almashish, xalqaro aloqalarni mustahkamlash va mas’uliyatli, ekologik jihatdan muvozanatli turizm kelajagini shakllantirishga xizmat qiluvchi jonli platformaga aylandi.