“Umra” ziyoratini amalga oshirish litsenziyasiga ega turoperatorlar yana ikkitaga ko‘paydi
2025-05-19 11:10:00 / Yangiliklar
Unga ko‘ra, O‘zbekiston Respublikasi Din ishlari bo‘yicha qo‘mitasi “Umra” tadbirlarini tashkil etish va o‘tkazish yo‘nalishida ziyoratchilarga amallarni munosib va xavfsiz bajarishlari uchun shart-sharoitlar yaratish, ularning huquqlari va qonuniy manfaatlarini himoya qilish, shuningdek, sifatli va kafolatlangan xizmatlardan foydalanishiga mas’ul tashkilot hisoblanadi.
Din ishlari bo‘yicha qo‘mitasining “Umra” tadbirlarini tashkil etish va oʻtkazish faoliyatini amalga oshirish uchun yakka tartibdagi litsenziya berish boʻyicha Tanlov komissiyasi tomonidan “Centrum holidays” MChJ (Toshkent shahri) va “Buxoro umra jamiyati” MChJ (Buxoro viloyati) tadbirkorlik subyektlariga maxsus litsenziya berildi.
O‘zbekiston Respublikasi Din ishlari bo‘yicha qo‘mitasi tomonidan “Umra” tadbirlarini tashkil etish va o‘tkazish bo‘yicha xizmatlar ko‘rsatishga litsenziya olgan tadbirkorlik subyektlari reyestri ochiq ma’lumot sifatida doimiy ravishda yangilanib borishi bildiriladi.
Ogoh boʻling! “Umra” tadbirlarini tashkil etish va oʻtkazishga oid xizmatlarini litsenziyaga ega boʻlmagan tadbirkorlik subyektlari tomonidan koʻrsatish taqiqlangan.
UMRA ZIYORATINI AMALGA OSHIRISHDA FIRIBGARLARGA ALDANIB QOLMANG!