Nukus sayyohlik maskani sifatida turmarshrutingizga kiritishingiz lozim
2025-05-02 12:20:00 / Yangiliklar
O‘zbekistonning Buyuk Britaniyadagi sayyohlik brendi elchisi Sofi Ibbotson Weproject.media portalida maqola e’lon qilib, o‘quvchilarni san’at muzey devorlaridan tashqariga chiqadigan Nukus shahriga tashrif buyurishga taklif etdi. U o‘z maqolasida Qoraqalpog‘iston poytaxti Nukus garchi sayyohlik marshrut dasturlariga kamdan-kam kiritilsa-da, bu yerga kelishga jazm qilganlar Markaziy Osiyoning haqiqiy san’at poytaxtini kashf etishlarini ta’kidlaydi.
Muallif ta’kidlaganidek, rus va turkiston avangardining noyob to‘plamiga ega Savitskiy muzeyi shaharning asosiy madaniy boyligi hisoblanadi. Biroq Nukusdagi san’at faqat muzey bilan cheklanib qolmay, butun shahar muhitiga singib ketgan. Zamonaviy qoraqalpoq rassomlarining galereya va ustaxonalarda ko‘rish mumkin bo‘lgan asarlari, shuningdek, ko‘cha mozaikalari va san’at inshootlari shaharni jonli san’at markaziga aylantirgan.
Sofi Ibbotson, shuningdek, san’at shaharning rivojlanayotgan turizm sektorining muhim qismiga aylanayotganiga e’tibor qaratadi. Nukus san’at jamoat joylarida yashaydigan va shaharning kundalik hayotiga ta’sir ko‘rsatadigan o‘ziga xos madaniy muhitga qiziquvchi sayyohlarni tobora ko‘proq jalb qilmoqda.