O‘zbekiston Respublikasi Turizm qo‘mitasi

Xabaringiz bor, shu kunlarda Turizm qo‘mitasi tomonidan Pokiston Islom Respublikasi hukumati, turistik kompaniyalari, mehmonxona boshqaruvi va sayyohlik sohasida faoliyat yurituvchi ishbilarmon doiralari hamda OAV vakillari ishtirokida ushbu mamlakatning Lahor, Karachi va Islomobod shaharlarida O‘zbekistonning turizm imkoniyatlari targ‘ibotiga bag‘ishlangan “Road Show” tadbirlari tashkil etilmoqda.

“Road Show”ning ikkinchi kuni doirasida mamlakatda eng ko‘p aholi yashovchi Karachi shahrida tadbir bo‘lib o‘tdi. Unda Sind viloyati hokimligi rasmiylari, mahalliy turizm biznesi vakillari, shuningdek, O‘zbekistondan turizm sohasi rasmiylari va turoperatorlaridan iborat jami 300 nafardan ortiq ishtirokchilar qatnashdi.

Tadbirda Sind provinsiyasi gubernatori maslahatchisi Tariq Mustafo, Sind turizmni rivojlantirish korporatsiyasi boshqaruvchi direktori Syed Feyaz Ali va Pokiston sayyohlik agentliklari uyushmasi raisi Muhammad Naim Sharif so‘zga chiqib, mamlakatlar o‘rtasida turizm sohasidagi hamkorlikni rivojlantirish, jumladan, ziyorat va “halal tourism” (halol turizm) yo‘nalishlarida yangi sayyohlik paketlarini ishlab chiqish, transchegaraviy yo‘nalishlarni joriy etish, shuningdek, turistik shaharlarga to‘g‘ridan-to‘g‘ri aviaqatnovlarni yo‘lga qo‘yish, viza erkinliklari masalasi hamda turizm sohasidagi tajribalarni almashish bo‘yicha o‘z fikrlarini bildirdilar.

“Road Show” doirasida “O‘zbekiston – Ipak yo‘li durdonasi” taqdimoti namoyishi hamda ikki davlatning turistik operatorlari o‘rtasida “B2B”, “G2B” va “G2G” uchrashuvlar tashkil etildi. Shu bilan birga, “Uzbekistan Airways” milliy aviakompaniyasi taqdimoti ham o‘tkazildi.

Taqdimotlarda O‘zbekistonning ziyorat turizmi salohiyati, keyingi yillarda jadal rivojlanib borayotgan qishki va tog‘ turizmi, shuningdek mamlakatning o‘ziga xos gastronomik imkoniyatlari haqida batafsil ma’lumotlar berildi.

Shuningdek, pokistonliklarning O‘zbekistondagi tarixiy ziyoratgohlariga sayohatlarini ko‘paytirish maqsadida manfaatli loyihalarni amalga oshirish bo‘yicha kelishib olindi.