Xitoy OAVlari sayyohlarni “O‘zbekistonning baland tog‘larida joylashgan go‘sha” bilan tanishtirmoqda
2025-03-26 12:30:00 / Yangiliklar
Maqola o‘quvchilarni mamlakatimizning tabiiy go‘zalliklari, madaniy merosi va faol dam olish imkoniyatlari bilan tanishtiradi hamda xorijlik sayyohlarning e’tiborini jalb etadi.
Maqolada Qashqadaryo viloyati Shahrisabz tumanidagi dengiz sathidan 2600 metr balandlikda joylashgan tog‘ qishlog‘i - G‘elon haqida so‘z yuritiladi. Ta’kidlanishicha, mazkur qishloqqa manzarali, ammo murakkab tog‘ yo‘li orqali borish mumkin, shuning uchun ushbu hududga sayohat qilish qiziqarlidir.
Nashrda ta’kidlanganidek, G‘elon qishlog‘i o‘zining tarixi, betakror tabiati va noyob me’morchiligi bilan sayyohlarni o‘ziga jalb etadi. Bu yerda sayyohlar mahalliy aholi bilan suhbatlashib, ularning turmush tarzini kuzatishlari mumkin.
Qayd etilishicha, G‘elon faol dam olishni xush ko‘ruvchilar uchun juda qulay bo‘lib, u go‘zal tog‘ so‘qmoqlari bo‘ylab piyoda sayr qilish uchun keng imkoniyatlarni taklif etadi. Sayyohlar Qo‘l, Sarchashma va Shut kabi qo‘shni qishloqlarga tashrif buyurib, nafaqat tabiiy go‘zalliklardan, balki ushbu baland tog‘ hududlarining o‘ziga xos madaniy xususiyatlaridan ham bahramand bo‘lishlari mumkin.