Surxondaryoda ichki turizm yarmarkasi tashkil etildi
2025-03-18 11:15:00 / Yangiliklar
Surxondaryo viloyatidagi “Boysun bahori” turizm majmuasida viloyatda mavjud turizm obyektlariga aholini keng jalb qilish, turizm sohasidagi tadbirkorlik subyektlari va turistik maskanlarni qo‘llab-quvvatlash, turoperator va turagentlarni isteʼmolchilarga tanishtirish maqsadida “Ichki turizm yarmarkasi” tashkil etildi.
Yarmarka doirasida milliy madaniyat markazlari, viloyatning o‘ziga xos turistik maskanlari, madaniy meros obyektlari va biologik xilma-xillik namoyish etildi. Shuningdek, hunarmandchilik mahsulotlari ko‘rgazmalari uyushtirilib, tashrif buyuruvchilarga mahalliy hunarmandlar tomonidan ishlab chiqarilgan mahsulotlar taqdim qilindi.
Tadbir davomida turizm sohasi vakillari o‘rtasida “B2B” uchrashuvlari o‘tkazilib, o‘zaro hamkorlikni rivojlantirish bo‘yicha bir qator shartnoma va kelishuvlar imzolandi.
Yarmarka ichki turizmni yanada rivojlantirish, yangi turistik yo‘nalishlarni kengaytirish hamda sohadagi tadbirkorlik subyektlarini qo‘llab-quvvatlashga xizmat qiladi.
