Turizm salohiyatini targ‘ib qilishning zamonaviy mexanizmlari bo‘yicha “Workshop” tashkil etildi
2025-02-28 10:25:00 / Majlislar
Tadbir “Reformatics” (Gruziya) konsalting kompaniyasi ishtirokida tashkil etildi. Mazkur kompaniya bilan yil boshida 2040-yilgacha O‘zbekiston turizmni rivojlantirish strategiyasini ishlab chiqish bo‘yicha uch tomonlama shartnoma imzolangan edi. Wokrshopda chet elda marketing strategiyasini ishlab chiqish va tashkil etish uchun mas’ul bo‘lgan idora xodimlari va aloqador tashkilotlar mutaxassislari ishtirok etdi.
Seminarning asosiy mavzularidan biri maqsadli auditoriya bilan manzilli ishlash bo‘lib, bu marketing va investitsiya sa’y-harakatlarini sayyohlarni jalb qilishga aniqroq yo‘naltirish imkonini beradi. Turizm infratuzilmasini rivojlantirish va transport jihatidan qulaylik masalalariga ham e’tibor qaratildi. Nazariy qism aniq misollar bilan mustahkamlandi. Rivojlangan turizm bozorlariga ega mamlakatlarning ilg‘or tajribasini o‘zlashtirish O‘zbekistonga raqobatbardosh turizm mahsulotini yaratishga va ko‘proq sayyohlarni jalb qilishga yordam berishi ta’kidlandi.
Amalga oshirilayotgan sa’y-harakatlar mamlakatning sayyohlik jozibadorligini oshirish, biznes uchun imkoniyatlarni kengaytirish va uzoq muddatli istiqbolda barqaror turizm rivojlanishini yaratishda muhim qadam bo‘ladi.