Yaponiya telekanali O‘zbekiston haqida turkum ko‘rsatuvlar namoyish etdi
2025-02-12 09:00:00 / Yangiliklar
Turizm qo‘mitasi va O‘zbekistonning Yaponiyadagi elchixonasi tomonidan tashkil etilgan ushbu loyiha yaponiyalik tomoshabinlarni O‘zbekiston madaniyati va yutuqlari bilan tanishtirishga qaratilgan.
Yanvar oyida MBS telekanalining suratga olish guruhi O‘zbekistonga tashrif buyurdi. Birinchi ko‘rsatuv Toshkent haqida bo‘lib, unda boshlovchi Xaruka Maeda “Besh qozon” osh markaziga tashrif buyurib, o‘zbek milliy taomi - osh tayyorlash jarayoni bilan tanishdi.
So‘ng “Alisher Navoiy”, “Kosmonavtlar” kabi o‘ziga xos arxitekturaga ega Toshkent metropoliteni bekatlarini ko‘zdan kechiradi. Shuningdek, u yo‘lovchilar bilan suhbatlashib, ularning metro haqidagi fikrlarini o‘rganadi.
Ko‘rsatuvning keyingi soni Samarqand shahri, uning “Registon” majmuasi, “Bibixonim” masjidi va Siyob bozori kabi tarixiy obidalariga bag‘ishlangan. Shuningdek, Maeda tabiiy materiallardan buyumlar yasovchi hunarmandlarning mahoratini alohida ta’kidlab o‘tgan.
Dasturning maxsus sonlari tomoshabinlardan ijobiy baho oldi va 2025-yilning 13-aprelidan 13-noyabrigacha Yaponiyada o‘tkaziladigan “Expo Osaka 2025” ko‘rgazmasi davomida yana namoyish etilishi kutilmoqda.