O‘zbekiston Respublikasi Turizm qo‘mitasi

Kuala-Lumpur shahrida o‘tkazilgan brifingda turistik assotsiatsiyalar, aviakompaniyalar, tegishli tashkilotlar vakillari, shuningdek turkompaniyalar va ommaviy axborot vositalari ishtirok etib, «Umra +» dasturini rivojlantirish va ommalashtirish masalalarini muhokama qildilar.

Brifing davomida O‘zbekistonda turizm sohasida amalga oshirilayotgan islohotlar, shuningdek Malayziya va Indoneziyadan keladigan ziyoratchilar oqimini oshirishga qaratilgan chora-tadbirlar haqida batafsil ma’lumot berildi. Ziyoratchilar uchun yaratilgan sharoitlar va turoperatorlarga taqdim etilayotgan imtiyozlarga alohida e’tibor qaratildi.

Tadbir doirasida mehmonlar O‘zbekistonning boy tarixiy-madaniy merosi, jumladan, islom sivilizatsiyasi rivojida muhim o‘rin tutgan Toshkent, Samarqand va Buxoro shaharlari bilan tanishtirildi. Shuningdek, ziyoratchilar va xorijiy mehmonlarni qulay qabul qilish uchun barpo etilgan zamonaviy turistik obyektlar va majmualar, xususan, davlat rahbari tashabbusi bilan qurilgan Islom sivilizatsiyasi markazi va kengaytirilgan Imom al-Buxoriy majmuasi katta qiziqish uyg‘otdi.

Brifingning muhim natijalaridan biri O‘zbekiston va Malayziya turistik assotsiatsiyalari o‘rtasida «Umra +» dasturi doirasida hamkorlik to‘g‘risidagi memorandumning imzolanishi bo‘ldi. Ushbu hujjat ziyorat turizmi sohasida qo‘shma amaliy loyihalarni amalga oshirish, tajriba almashish va barqaror hamkorlik aloqalarini rivojlantirishni nazarda tutadi.

Tadbir O‘zbekiston Respublikasi Vazirlar Mahkamasining 2026-yil 9-yanvardagi “Umra plyus” ziyorat turizmi dasturini amalga oshirishga qaratilgan qoʼshimcha chora-tadbirlar toʼgʼrisida”gi 6-sonli qarori ijrosini ta’minlashga qaratilgan.