O‘zbekiston Respublikasi Turizm qo‘mitasi

Tashabbus Yaponiyaning “Club Tourism International Inc.” sayyohlik kompaniyasi bilan hamkorlikda, O‘zbekistonning Yaponiyadagi turizm elchisi Kaysuke Minami ko‘magida amalga oshirildi. Tadbirda 200 ga yaqin mehmon ishtirok etdi.

Elchixona tomonidan tashkil etilgan taqdimot davomida so‘nggi yillarda O‘zbekistonda turizmni rivojlantirish davlat siyosatining ustuvor yo‘nalishlaridan biriga aylangani ta’kidlandi. Infratuzilmani modernizatsiya qilish, sohani isloh etish va xorijiy fuqarolar uchun kirish tartiblarini soddalashtirish natijasida O‘zbekiston Markaziy Osiyoning yetakchi sayyohlik yo‘nalishlaridan biri sifatida o‘z imidjini mustahkamlab bormoqda.

Qayd etilishicha, amalga oshirilgan islohotlar allaqachon sezilarli natijalar bermoqda: 2025-yilda O‘zbekistonga qariyb 12 million nafar xorijiy sayyoh tashrif buyurgan. Ayniqsa, Yaponiya tomondan qiziqishning ortib borayotgani alohida ta’kidlandi — turistik maqsadlarda O‘zbekistonga kelgan yapon fuqarolari soni ilk bor 32 ming kishidan oshib, o‘tgan yilga nisbatan 162 foizga ko‘paydi.

Tadbir ishtirokchilariga O‘zbekistonning madaniy-tarixiy merosi, YUNESKO Butunjahon merosi ro‘yxatiga kiritilgan obyektlar, hududlarning turistik salohiyati, milliy urf-odatlar, an’anaviy taomlar hamda yapon sayyohlari uchun qiziqarli bo‘lgan mashhur yo‘nalishlar haqida batafsil ma’lumot taqdim etildi. Mehmonlarga O‘zbekistonni kelajakdagi sayohatlar uchun istiqbolli yo‘nalish sifatida ko‘rib chiqish taklif qilindi.

“Club Tourism International Inc.” kompaniyasining Nagoya filiali rahbari Kenji Yoshizaki yapon sayyohlarining O‘zbekistonga bo‘lgan qiziqishi barqaror o‘sib borayotganini ta’kidlab, yangi turistik dasturlar ishlab chiqilayotganini ma’lum qildi. Xususan, «Turizm elchisi Kaysuke Minami bilan O‘zbekistonga sayohat» nomli maxsus tur yo‘lga qo‘yilishi rejalashtirilmoqda.

O‘z navbatida, O‘zbekistonning Yaponiyadagi turizm elchisi, mashhur aktyor Kaysuke Minami 2025-yil avgust oyida O‘zbekistonga qilgan safari haqidagi taassurotlari bilan o‘rtoqlashib, mamlakatning boy tarixiy merosi va turistik imkoniyatlari haqida so‘zlab berdi.

Shuningdek, tadbir doirasida O‘zbekistonning maxsus axborot stendi tashkil etilib, unda tashrif buyuruvchilar yapon tilida chop etilgan turistik xaritalar va bukletlar bilan tanishish imkoniga ega bo‘ldilar.