O‘zbekiston sayyohlik salohiyati Avstriyada namoyish etildi
2026-01-20 12:40:00 / Yangiliklar
Turizm qo‘mitasi 15-18 yanvar kunlari Venaning “VIECON” ko‘rgazmalar markazida bo‘lib o‘tgan tadbirda tashkil etgan milliy stend ko‘rgazmadagi eng yorqin va e’tiborni tortadigan joylardan biriga aylandi. Tashrif buyuruvchilarga O‘zbekistonning boy madaniy merosi, an’anaviy xalq hunarmandchiligi, shuningdek, mamlakatning xilma-xil va betakror sayyohlik salohiyatini aks ettiruvchi zamonaviy sayohat yo‘nalishlari namoyish etildi.
Ko‘rgazmani Yevropa va dunyoning o‘nlab mamlakatlaridan kelgan sayyohlik agentliklari, aviakompaniyalar, sarmoyadorlar va ommaviy axborot vositalari vakillari ziyorat qildi. O‘zbekiston stendi o‘zining mazmunli taqdimot dasturi, milliy kuy-qo‘shiqlari, hamda sharqona mehmondo‘stlik ruhini aks ettiruvchi jo‘shqin muhiti bilan ko‘pchilikning e’tiborini o‘ziga jalb etdi.
Tadbir doirasida xalqaro hamkorlar bilan turizm sohasidagi hamkorlikni kengaytirish, qo‘shma loyihalarni rivojlantirish va yangi sayyohlik oqimlarini jalb qilishga qaratilgan ishbilarmonlik uchrashuvlari va muzokaralari o‘tkazildi.