Germaniyalik jurnalist O‘zbekistonga safari haqida
2026-01-08 17:25:00 / Yangiliklar
Germaniyaning "CTOUR Touristik Forum" kompaniyasi prezidenti va mustaqil jurnalist Fred Xafner O‘zbekiston Turizm qo‘mitasi tomonidan tashkil etilgan “Ipak yo‘lida turizm” 30-Toshkent xalqaro turizm yarmarkasi doirasidagi media-kampusda 2025-yil 18-28-noyabr kunlari o‘tkazilgan “O‘zbekiston yangi nigohda: dunyoni ilhomlantiruvchi hikoyalar yaratish” media-forumida ishtirok etdi.
Muallif O‘zbekistonni Markaziy Osiyodagi eng tez sur’atlarda rivojlanayotgan va izchil islohotlarni amalga oshirayotgan mamlakatlardan biri sifatida tasvirlab, turizm sohasidagi asosiy ko‘rsatkichlar va faktlarni tahlil etadi. Tarixiy yodgorliklar, bozorlarga va mahalliy aholi bilan uchrashuvlarga alohida e’tibor qaratilgan bo‘lib, ularning mehmondo‘stligi va ochiqko‘ngilligi kuchli taassurot qoldiradi.
Asosiy mavzulardan biri - temir yo‘llar, yuqori tezlikdagi poyezdlar va yangi mehmonxonalarni o‘z ichiga olgan infratuzilmaviy taraqqiyot, shuningdek, iqtisodiyotning muhim tarmog‘i sifatida turizmning rivojlanishidir. O‘zbekiston nafaqat sayyohlar sonini ko‘paytirishga, balki ularning mamlakatda qolish muddatini uzaytirish va mehmondo‘stlik sanoatidan keladigan daromadni oshirishga ham intilmoqda. Maqolada Toshkentning zamonaviy metrosi, rivojlangan transport marshrutlari va sayohatchilar uchun turli xil turar joy imkoniyatlari haqida so‘z yuritiladi.
Bundan tashqari, jurnalist madaniy-tarixiy merosni, ayniqsa "dunyodagi eng go‘zal joy" deb ta’riflangan Samarqanddagi Registonni, shuningdek tashrif buyuruvchilarni qadimiy Sharq muhitiga olib kiruvchi Xiva va Buxoro me’morchiligini alohida ta’kidlaydi.
Xulosa qilib, u O‘zbekistonning sayyohlik yo‘nalishi sifatidagi ulkan salohiyatini, ayniqsa Yevropa kurortlariga nisbatan sayohat narxining arzonligini hisobga olgan holda ta’kidlaydi va mamlakatning keng doiradagi sayyohlar uchun jozibador bo‘lishiga ishonch bildiradi.