O‘zbekiston Respublikasi Turizm qo‘mitasi

Forum doirasida “Students Cup 2025” Respublika tanlovi va “HSE Creative Open: O‘zbekiston madaniyati zamonaviy dizaynda” xalqaro onlayn tanlovi yakunlari sarhisob qilindi. G‘oliblarga diplom, pul mukofotlari va esdalik sovg‘alari topshirildi. “Students Cup 2025” tanlovida mamlakatimizning 30 ta oliy o‘quv yurtidan 80 dan ortiq loyihalar, jumladan, Mirzo Ulug‘bek nomidagi O‘zbekiston Milliy universiteti, Namangan davlat texnika universiteti va “Ipak yo‘li” turizm va madaniy meros xalqaro universiteti loyihalari ishtirok etdi. Xalqaro onlayn tanlov O‘zbekiston, Rossiya, Kipr va AQSHdan kelgan talabalarni birlashtirdi, ular orasida yuqori darajadagi ijodkorlik va kasbiy mahoratni namoyish etgan g‘oliblar ham aniqlandi.

Bundan tashqari, forumni tashkil etishga qo‘shgan hissasi uchun 30 ga yaqin ko‘ngillilar, jumladan, Toshkent davlat transport universiteti va Toshkent irrigatsiya va qishloq xo‘jaligini mexanizatsiyalash instituti talabalari taqdirlandi. Forum dasturiga Rossiyaning “Shaharlar ifori” loyihasi muallifining sensorli turizm bo‘yicha mahorat darsi kiritilgan bo‘lib, unda ishtirokchilar O‘zbekiston shaharlari ruhini aks ettiruvchi xushbo‘y kompozitsiyalar yaratdilar.

“Katta Oltoy” oltoyshunoslik va turkshunoslik ilmiy-ta’lim markazi tomonidan tashkil etilgan “Farg‘ona arxeologik-etnografik ekspeditsiyasi – 2025” loyihasiga alohida e’tibor qaratildi. O‘zbekiston va Rossiya olimlari hududlarning sayyohlik salohiyatini baholadilar, arxeologik va etnografik obyektlar, hunarmandlar va an’analar bilan tanishdilar, shuningdek, madaniy, ekologik va gastronomik turizm yo‘nalishlarini ishlab chiqdilar.

Forum turizmda ilmiy yondashuvning muhimligini ta’kidlab, xalqaro hamkorlikni rivojlantirish, mutaxassislar va yosh tadqiqotchilar o‘rtasidagi aloqalarni mustahkamlashga xizmat qildi.