Xavflarni boshqarish qoʻmitasining 2026-yil ikkinchi chorak yakunlariga bagʻishlangan yigʻilish boʻlib oʻtdi.
2026-08-07 20:30:00 / Jamg'arma yangiliklari
Joriy yilning 7-avgust kuni Pensiya jamgʻarmasida Xavflarni boshqarish qoʻmitasining 2026-yil ikkinchi chorak yakunlariga bagʻishlangan navbatdagi yigʻilishi boʻlib oʻtdi.
Unda Qoʻmita aʼzolari, Pensiya jamgʻarmasi rahbariyati hamda masʼul mutaxassislar ishtirok etdi.
Yigʻilish davomida davlat moliyasini boshqarish tizimida moliyaviy va boshqa xavflarni aniqlash, baholash hamda boshqarish boʻyicha belgilangan talablarning Pensiya jamgʻarmasi faoliyatida ijrosini taʼminlash, shuningdek, Xavflarni boshqarish qoʻmitasi faoliyatining joriy holati muhokama qilindi.
Taʼkidlanganidek, Pensiya jamgʻarmasi faoliyatida xavflarni samarali boshqarish fuqarolarga pensiyalarni oʻz vaqtida, toʻgʻri va toʻliq yetkazib berish, davlat mablagʻlaridan oqilona foydalanish, ortiqcha toʻlovlarning oldini olish, qarzdorlikni kamaytirish, korrupsiyaviy holatlarning oldini olish hamda axborot tizimlari barqarorligini taʼminlashda muhim ahamiyat kasb etadi.
Yigʻilishda joriy yil boshida shakllantirilgan xavflar reestri, undagi oʻrta va yuqori darajadagi xavflar boʻyicha tasdiqlangan chora-tadbirlar rejasining 2026-yil ikkinchi choragi davomidagi ijrosi yuzasidan amalga oshirilgan ishlar tahlil qilindi. Masʼul boʻlinmalar tomonidan bajarilgan ishlar yuzasidan axborotlar tinglanib, mavjud muammolar va ularni bartaraf etish boʻyicha takliflar muhokama etildi.
Shuningdek, kun tartibiga muvofiq, Qoʻmitaning ishchi organi hisoblangan Ichki audit boshqarmasining ikkinchi chorakda xavflarni boshqarish jarayoni yuzasidan amalga oshirgan ishlari toʻgʻrisidagi hisoboti eshitildi.
Chora-tadbirlar rejasining ijrosi tanqidiy tahlil qilinib, aniqlangan kamchiliklarni bartaraf etish, xavflarni kamaytirish boʻyicha qoʻshimcha takliflar koʻrib chiqildi hamda tegishli qarorlar qabul qilindi.
Yigʻilish yakunida xavflarni boshqarish tizimini yanada takomillashtirish, belgilangan vazifalar ijrosini tizimli nazorat qilish hamda masʼul boʻlinmalar faoliyati samaradorligini oshirish yuzasidan tegishli topshiriqlar belgilandi.