O‘zbekiston Respublikasi Oliy taʼlim, fan va innovatsiyalar vazirligi

Dastlab YUNESKOning Oliy ta’lim sohasidagi malakalarni tan olish to‘g‘risidagi Global konvensiyasining Hukumatlararo Konferensiyasi noodatiy sessiyasida ishtirok etildi.

Ma’lumot o‘rnida, Global konvensiya oliy ta’limga oid malakalarni davlatlar o‘rtasida adolatli, shaffof va kamsitilmasdan tan olishning universal tamoyillarini belgilaydi va oliy ta’lim olish hamda keyingi o‘qish va ishga joylashish imkoniyatini beradi.

Tadbirni YUNESKO bosh direktorining ta’lim bo‘yicha o‘rinbosari Stefan Djanini kirish so‘zi bilan ochib berdi. Uning so‘zlariga ko‘ra, bugungi kunda  jahonda umumiy 250 mln dan ortiq talabalar ta’lim olayotgan bo‘lib, ulardan 6 mln dan ortig‘i o‘z mintaqasidan tashqarida tahsil oladi va bu holat ularning malakalari hamda ko‘nikmalarining tan olinishida qator muammo va savollarni keltirib chiqaradi. Shuningdek, dunyo aholisining oliy ta’lim bilan qamrovini kengaytirishda gender tenglikni ta’minlash, qochoqlarni ta’lim olishini ko‘llab-quvvatlash kabilar Malakalarni tan olish to‘g‘risidagi Global konvensiyasining asosiy maqsadi hisoblanadi.  

S.Djanini hozirda Global konvensiyaning ratifikatsiya qilgan mamlakatlar soni ortib borayotganini tilga olib, harakatlar ijobiy natija berishi uchun qamrovni oshirish zaruratiga alohida to‘xtalib o‘tdi. Bu borada YUNESKO tomonidan qator mamlakatlarga texnik va konsultativ ko‘mak ko‘rsatilayotgani ma’lum qilindi. 

Ma’lumot uchun, 2024-yil  mart holatiga ko‘ra, Konvensiyani 28 ta davlat ratifikatsiya qilgan va yana 20 ga yaqin davlat ratifikatsiya qilish jarayonida.

Global konvensiyani ratifikatsiya qilish orqali davlatlar oliy ta’lim sohasida xalqaro hamkorlikni mustahkamlash, uning sifatini mamlakatimizda va butun dunyo bo‘ylab oshirish hamda akademik mobillik va malakalarning tan olinishini butun dunyo bo‘ylab amalga oshirilishida yordam berish majburiyatini oladi.

Tadbir doirasida Global konvensiya ishtirokchi davlatlari vakillaridan iborat ishchi guruhlarining amalga oshirgan ishlari natijalari tinglandi va 2024–2025-yil uchun ishtirokchi mamlakatlarning o‘zaro harakatlari Dasturi tasdiqlandi.
 
Tadbirdan so‘ng YUNESKOning uzluksiz ta’lim tizimlari va siyosati bo‘limi rahbari Boren Chakrun va tashkilotning oliy ta’lim bo‘yicha loyiha koordinatori Tortian Xassmik bilan uchrashuv o‘tkazildi. 
   
B.Chakrun uchrashuv avvalida davlat rahbari Sh.Mirziyoyev tomonidan amalga oshirilayotgan islohotlar ko‘lamini yuqori baholadi. Muloqot davomida O‘zbekistoning Global konvesiyaga a’zo bo‘lishini ko‘llab-quvvatlash, oliy ta’lim tizimini yanada rivojlantirish borasida YuNESKO bilan hamkorlikda loyihalarni yo‘lga qo‘yish, ular uchun mablag‘ jalb etish bo‘yicha takliflar muhokama qilinib, yakunda tashkilot ishchi guruhining joriy yil aprel oyida O‘zbekistonga tashrifini tashkil etish bo‘yicha kelishuvga erishildi.

Fransiya Oliy ta’lim va tadqiqotlar vazirligining Yevropa va xalqaro ishlar bo‘yicha maslahatchisi o‘rinbosari M.Buar, Fransiya Tashqi ishlar vazirligining madaniyat, ta’lim va tadqiqotlar bo‘yicha departament direktori M.Peyro, “Campus France” agentligining Marketing va stipendiyalar boshqarmasi boshlig‘i E.Jado bilan uchrashuvlar o‘tkazildi. 

Muzokaralarda ikki davlat rahbarlarining oliy darajadagi tashriflari doirasida erishilgan kelishuvlarni amalga oshirishni jadallashtirish choralari yuzasidan qator kelishuvlarga erishildi. Jumladan:

1. O‘zbekistonda O‘zbek-fransuz universiteti faoliyatini yo‘lga qo‘yish.  
Ushbu yo‘nalishda oliy ta’limga mas’ul ikki vazirlik o‘rtasida tegishli Bitim imzolanadi va universitet faoliyatini tashkil etishda ko‘mak ko‘rsatish uchun fransuz OTMlaridan iborat guruh a’zolari kengaytiriladi.

2. O‘zbekistonlik talabalar uchun Fransiyada ta’lim olishi uchun grant o‘rinlari ajratish. 
Oliy ta’lim, fan va innovatsiyalar vazirligi bilan “Sampus France” agentligi hamkorligida yoshlarni Fransiya OTMlariga ta’lim olish uchun yuborish mexanizmi ishlab chiqiladi va hamkorlikda moliyalashtirish choralari ko‘riladi.  

3. O‘zbekistonda ilg‘on muhandislik maktablarini tashkil etishda hamkorlik olib borish. 
Fransiyaning muhandislik maktablari direktorlari assotsiyatsiyasi va “Sentrale supelec” muhandislik maktablari bilan hamkorlik olib boriladi va ushbu hamkorlik doirasida Fransiyaning sohaga ixtisoslashgan litseylari va OTMlari qoshidagi maxsus maktablari tajribalari o‘rganiladi. 

4. O‘zbekiston–Fransiya oliy ta’lim forumini o‘tkazish. 
2024-yilning oktabr oyida Toshkent shahrida ikki davlat universitetlari ishtirokida forum tashkil etiladi va ushbu tadbirda Fransiyaning tegishli vazirliklari mas’ullari ham ishtirok etadi. 

5. O‘zbekistonlik yoshlarni fransuz tiliga o‘qitishni yanada kengaytirish. 
Ushbu yo‘nalishda “Alliance française” tashkiloti bilan O‘zbekistonning hududlarida fransuz tilini o‘qitish va bilimni baholash borasida ishlar kengaytiriladi. Shuningdek, o‘zbekistonlik fransuz tili o‘qituvchilari uchun malaka oshirish dasturlari tashkil etiladi.

Shuningdek, tashrif doirasida Fransiyaning Renn universiteti milliy muhandislik maktabi direktori K.Musho va Paute universiteti prorektori K.Fernandes-Maluane bilan uchrashuv o‘tkazildi.  
Ularda O‘zbek-fransuz universitetining ta’lim yo‘nalishlari, talabalar qamrovi va darajalari kabi tafsilotlar muhokama qilindi. 

Mart oyining ikkinchi yarmida O‘zbekistonda universitet ochish borasida navbatdagi fransuz OTMlaridan iborat guruhning tashrifi amalga oshirilishiga kelishib olindi.