Andijonda talabalarning sifatli ta’lim olishi uchun yana bir qulaylik yaratildi
2025-02-18 18:00:00 / Vazirlik yangiliklari
18-fevral kuni Oliy ta’lim, fan va innovatsiyalar vaziri Qo‘ng‘irotboy Sharipov hamda Andijon viloyati hokimi Shuhratbek Abdurahmonov boshchiligida yangi o‘quv binosining tantanali ochilish marosimi o‘tkazildi. Tadbirda so‘zga chiqqan rasmiylar davlatimiz rahbarining e’tibori tufayli qad rostlagan ushbu loyiha viloyatda ta’lim sifatini yangi bosqichga olib chiqishga xizmat qilishini ta’kidlab, bino universitetning rivojlanishi, ilmiy va innovatsion yutuqlarini oshirishda muhim ahamiyat kasb etishini qayd etdilar.
Marosimdan so‘ng, mehmonlar yangi o‘quv binosi bilan tanishib, uning imkoniyatlari va jihozlanish darajasini yuqori baholadilar. Yangi bino 7 qavatdan iborat bo‘lib, 1800 nafar talaba uchun mo‘ljallangan. Unda 15 ta keng ma’ruzalar zali, 24 ta zamonaviy jihozlangan laboratoriya xonasi, 17 ta o‘quv xonasi hamda 11 ta zamonaviy kompyuter xonasi mavjud.
Yig‘ilganlar mazkur inshoot universitetda ilm-fan va ta’lim sifatini yanada oshirishga, yosh avlodga yuqori darajadagi bilim berishga xizmat qilishini qayd etishdi.