“Ma’naviyat hayotimizda yangi kuch, yangi harakatga aylanishi kerak” mavzusida malaka oshirish o‘quv-seminari o‘tkazilmoqda
2025-02-17 12:00:00 / Vazirlik yangiliklari
Seminarning asosiy maqsadi – oliy ta’lim muassasalarida ma’naviy-ma’rifiy ishlarni tizimli tashkil etish, ularning samaradorligini oshirish hamda yoshlarning intellektual salohiyati, mafkuraviy immuniteti va vatanparvarlik ruhini mustahkamlashdir.
Tadbirni Oliy taʼlim, fan va innovatsiyalar vaziri o‘rinbosari Sarvarxon Buzrukxonov, hamda Respublika Ma’naviyat va ma’rifat markazi rahbari Otabek Hasanov ochib berib, davlat xizmatchilarining ma’naviy-axloqiy fazilatlari, rahbar xodimlarning mas’uliyati va madaniyati haqida so‘z yuritishdi.
Seminarda “O‘zbekiston–2030” strategiyasi, 2025-yilning “Atrof-muhitni asrash va ‘yashil’ iqtisodiyot yili” deb e’lon qilinishi mazmun-mohiyati, oliy ta’lim muassasalarida ma’naviy-ma’rifiy ishlarni rivojlantirish, jamiyat barqarorligiga ta’sir etuvchi tahdidlar va ularni bartaraf etish yo‘llari kabi mavzularda ma’ruzalar o‘tkazildi.
Ushbu malaka oshirish kurslari ta’lim muassasalarida ma’naviy-ma’rifiy ishlarni yangi bosqichga olib chiqish, milliy g‘oya va ma’naviyat targ‘ibotining ta’sirchanligini oshirishga xizmat qiladi.
Kurs 20-fevralga qadar olib borilib, unda “Ijtimoiy axloq va yangilanayotgan jamiyat”, “Rahbar ma’naviyati va kasb etikasi”, “Ma’naviy targ‘ibot ta’sirchanligini oshirish yo‘llari”, “Milliy g‘oyaning O‘zbekiston taraqqiyotdagi o‘rni, ma’naviy-ma’rifiy ishlarning holati”, jamiyat barqarorligiga salbiy ta’sir etuvchi tahdidlar va ularni bartaraf etish omillari, Ma’naviyat sektorini tashkil etish bilan bog‘liq masalalar kabi mavzularda ma’ruzalar qilish belgilangan.