Vazirlik tizimida byudjet mablag‘laridan samarali foydalanish masalalari muhokama etildi
2025-02-14 17:05:00 / Vazirlik yangiliklari
Seminarda Prezidentning 2024-yil 25-dekabrdagi “2025-yil uchun Oʻzbekiston Respublikasining Davlat byudjeti toʻgʻrisida”gi Qonuni ijrosini taʼminlash toʻgʻrisida”gi PQ–455-son Qarorida belgilangan sohaga ajratilgan byudjet mablagʻlarining maqsadli va samarali sarflanishi, byudjet mablagʻlari ijrosini monitoring qilish bilan bogʻliq vazifalar muhokama qilindi.
Oliy taʼlim, fan va innovatsiyalar vaziri oʻrinbosari Sarvarxon Buzrukxonov 2024-yilda sohaga ajratilgan mablagʻlardan samarali foydalanishda erishilgan natijalar bilan bir qatorda, tashkiliy-uslubiy jihatdan yoʻl qoʻyilgan kamchiliklarga eʼtibor qaratib, 2025-yilda moliyaviy nazorat samaradorligini yanada oshirish va qonun buzilish holatlarining oldini olish boʻyicha tavsiyalar berdi.
Shuningdek, yigʻilishda davlatimiz rahbari tomonidan joriy yilning 20-yanvar kuni ilgari surilgan “Tejamkorlik va barqarorlikni taʼminlash” tamoyili asosida byudjet mablagʻlarini tejash va ularning samaradorligini oshirish yoʻnalishida berilgan koʻrsatmalar muhokama qilindi.
Tadbir ishtirokchilari byudjet mablagʻlaridan samarali foydalanish, maqsadsiz xarajatlarga yoʻl qoʻymaslik, byudjet intizomiga rioya qilish hamda qonunbuzilish holatlarining oldini olish borasida barcha zarur chora-tadbirlarni koʻrishga chaqirildi.
Yigʻilish yakunida davlat dasturlarida belgilangan tadbirlarni oʻz muddatida moliyalashtirish, byudjet intizomiga qatʼiy amal qilish hamda xarajatlarni maqbullashtirish boʻyicha mutaxassislar tomonidan fikr-mulohazalar va takliflar bildirildi.