Oliy ta’lim, fan va innovatsiyalar vazirligi 2024-yilda O‘zbekistonning ta’lim tizimini zamonaviy talablarga moslashtirish va yoshlarni mehnat bozorida raqobatbardosh kadrlar sifatida tayyorlash uchun qator islohotlarni amalga oshirdi. Quyida ushbu islohotlarning asosiy yo‘nalishlari haqida to‘xtalib o‘tamiz.

Ta’lim yo‘nalishlarini maqbullashtirish.

O‘zbekiston ta’lim tizimi xalqaro standartlarga muvofiq ravishda isloh etilmoqda. Jumladan, mazmun jihatidan yaqin bo‘lgan bakalavriat ta’lim yo‘nalishlari 40% ga qisqartirildi. Natijada, 306 yo‘nalish o‘rniga 183 maqsadli yo‘nalish tashkil etildi. Bu yondashuv orqali resurslar oqilona taqsimlanib, talabalar uchun sifatli ta’lim olish imkoniyati yaratildi. Maqsadli yo‘nalishlar mehnat bozori ehtiyojlariga muvofiq ravishda tanlangan.

Kredit-modul tizimi va mustaqil o‘qish.

2024-yildan boshlab yangi davlat ta’lim standartlari joriy etildi. Bu standartlar asosida auditoriya darslari va mustaqil ta’lim nisbati qayta ko‘rib chiqildi: ilgari 90/10 bo‘lgan munosabat hozirgi kunda 50/50 yoki 40/60 nisbatida tashkil etildi. Bundan tashqari, talabalarning mustaqil ta’lim trayektoriyalarini shakllantirishga alohida e’tibor berildi.

Dual ta’lim tizimi.

O‘quv jarayonini ishlab chiqarish amaliyoti bilan uyg‘unlashtirish maqsadida dual ta’lim tizimi joriy etildi. Masalan, Toshkent to‘qimachilik va yengil sanoat institutida 3- va 4-kurs talabalari haftalik o‘quv rejasining 3 kunida nazariy ta’lim olib, qolgan 3 kunini ishlab chiqarishda amaliy ko‘nikmalar orttirishga sarflamoqda. Bu yondashuv talabalarning nazariy bilimlari va amaliy tajribasini uyg‘unlashtirib, raqobatbardosh mutaxassislar tayyorlash imkonini yaratadi.

Xalqaro akkreditatsiya va qo‘shma dasturlar.

O‘zbekistondagi 7 ta oliy ta’lim muassasasining 39 ta ta’lim dasturi xalqaro akkreditatsiyadan muvaffaqiyatli o‘tdi. Bu jarayon talabalarga jahon standartlariga mos ta’lim olish va xorijiy ish beruvchilar orasida tan olingan diplomlarga ega bo‘lish imkoniyatini taqdim etmoqda. Shuningdek, dunyodagi TOP-500 universitetlari bilan hamkorlikda 15 ta qo‘shma ta’lim dasturi yo‘lga qo‘yildi. Bu dasturlar ikki tomonlama diplom olish va nufuzli xorijiy oliygohlarda ta’lim olish imkoniyatini yaratadi.

Muhandislik sohasidagi ilg‘or loyihalar.

Muhandis kadrlarni tayyorlashni yanada takomillashtirish maqsadida, “tarmoq–korxona–oliygoh” zanjiri asosida ta’lim va ishlab chiqarish integratsiya qilinmoqda. Toshkent davlat texnika universiteti xalqaro tajribalar asosida yangi o‘quv rejalarini joriy etgan bo‘lsa, Buxoro muhandislik-texnologiya instituti “O‘zbekneftgaz” AJ bilan hamkorlikda “Kiberneftgaz” muhandislik maktabini tashkil etdi.

2024/2025-o‘quv yilidan boshlab...

Talabalarda amaliy ko‘nikmalar va kasbiy kompetensiyalarni shakllantirish maqsadida ishlab chiqarish amaliyotlari takomillashtiriladi. Ushbu jarayonda 15 haftalik malakaviy amaliyotlarni tashkil etish belgilangan bo‘lib, bu talabalarning nazariy bilimlarini amaliy jarayonlar bilan bog‘lashga qaratilgan muhim qadam hisoblanadi.

Ta’lim sohasida amalga oshirilayotgan islohotlar O‘zbekiston yoshlarini zamonaviy mehnat bozori talablariga muvofiq ravishda tayyorlashga qaratilgan. Bu jarayonda barcha taklif va tanqidlarni qabul qilgan holda, samarali yechimlarni joriy etishga tayyormiz.