Oʻzbekiston va Rossiya: vazir oʻrinbosarlari oliy taʼlim muassasalari faoliyatini yanada takomillashtirish masalalarini muhokama qildilar
2024-11-01 17:00:00 / Vazirlik yangiliklari
1-noyabr kuni Oliy taʼlim, fan va innovatsiyalar vaziri oʻrinbosari Otabek Mahkamov va Rossiya fan va oliy taʼlim vaziri oʻrinbosari Konstantin Mogilyovskiy oʻrtasida uchrashuv boʻlib oʻtdi. Uchrashuvda, shuningdek, Rossiya tomonidan Prezident Administratsiyasi vakillari hamda qator universitetlar masʼullari ishtirok etdi.
Unda tomonlar Rossiya oliygohlarining yurtimizdagi filiallari faoliyatini rivojlantirish, xususan, ularning moddiy-texnik bazasini mustahkamlash, ehtiyojdan kelib chiqib, yangi taʼlim yoʻnalishlarini tashkil etish va qator oʻquv loyihalarni amalga oshirish masalalarini muhokama qildilar.
Muloqot davomida Rossiya universitetlarining Oʻzbekistondagi filiallari faoliyatini takomillashtirish boʻyicha mavjud yoʻl xaritalarning ijro holati ham koʻrib chiqildi. Tomonlar mavjud masalalar yechimi boʻyicha birgalikda zarur choralar koʻrishga kelishib oldilar.
Shu bilan birga, “N.E. Bauman nomidagi Moskva davlat texnika universiteti” federal davlat byudjet oliy taʼlim muassasasining Oʻzbekistonda filialini tashkil etish borasida olib boriladigan ishlar boʻyicha fikr almashildi. Bundan tashqari, mazkur oliygoh tomonidan taklif etilgan — muhandis-texnik sohasiga qiziqishi boʻlgan iqtidorli yoshlarni topib saralash, ularni yetuk kadr etib tayyorlashga qaratilgan loyihalarni amalga oshirish imkoniyati koʻrib chiqildi.