Birinchi O‘zbekiston-Italiya ta’lim forumi boshlandi
2024-09-24 10:05:00 / Vazirlik yangiliklari
Ayni paytda Oliy ta’lim, fan va innovatsiyalar vazirligi tomonidan Toshkent shahridagi Turin politexnika universitetida o‘tkazilayotgan forumga tashrif buyurgan mehmonlar uchun universitet bo‘ylab tur tashkil etildi.
Mehmonlarga universitetning 130 mingdan ortiq adabiyotga ega Axborot-resurs markazi, kimyo laboratoriyalari, sport kompleksi, ma’ruza zallari, Mexatronika markazi faoliyati tanishtirildi.
Muassasaning maxsus laboratoriya va texnoparkida yosh tadqiqotchilar tomonidan olib borilayotgan tadqiqot ishlari va startap ishlanmalar taqdimot qilindi. Mehmonlarga bir vaqtning o‘zida 250 nafar talabaga xizmat ko‘rsatadigan Axborot-resurs markazida 6 tildagi adabiyotlar mavjudligi katta taassurot uyg‘otdi.
Ularga muassasaning rivojlanish strategiyasi, xususan, energiyatejamkor quyosh panellarini o‘rnatish borasidagi ishlar, spin-off kompaniyalari faoliyati, universitet ta’lim yo‘nalishlari, xalqaro hamkorlikka oid amalga oshirilgan ishlar ko‘rsatildi.