SamDAQU yangi o‘quv yiliga tayyor(mi?)
2024-08-28 18:00:00 / Rasmiy munosabat
Ushbu holat Oliy ta’lim, fan va innovatsiyalar vazirligi rahbariyati tomonidan nazoratga olinib, universitet ma’muriyatidan izoh olindi.
Universitetga ko‘ra quyidagilar ma’lum qilindi:
Ijtimoiy tarmoqlardagi ko‘rsatilgan suratlardagi ma’ruza xonalari Qurilish fakultetining eski, ta’mirlash ishlari ketayotgan o‘quv binolari hisoblanadi. Ushbu bino hamda jihozlarning ma’naviy eskirganligi va isitish tizimi ishdan chiqqanligi sababli joriy o‘quv yilida bu yerda o‘quv jarayonlari olib borilishi ko‘zda tutilmagan bo‘lib, ushbu fakultet barcha talabalari uchun darslar mashg‘ulotlari bosh binoda olib borilishi rejalashtirilgan.
Hozirgi kunda mazkur binoda pardozlash ishlari olib borilmoqda. Universitetning master-plani tasdiqlangach, yaqin yillar ichida ularning o‘rnida yangi, zamonaviy sharoitlarga ega bo‘lgan o‘quv binolari qurilishi maqsad qilingan.
Ma’lumot o‘rnida, Oliy ta’lim, fan va innovatsiyalar vaziri Qo‘ng‘irotboy Sharipov Samarqand viloyatiga qilgan xizmat safarida ham, ushbu oliygohda 2024/2025-o‘quv yiliga tayyorgarlik jarayonlarini ko‘zdan kechirib, eski o‘quv binolarini ta’mirdan chiqarish ishlarini jadallashtirish borasida ko‘rsatmalar bergandi. Shuningdek, universitet kampusida yangi sharoitlarga ega bo‘lgan 4 238 o‘rinli o‘quv binosi qurilishi, shuningdek 308 o‘rinli talabalar-turar joyi binosining rekonstruksiya qilish jarayonlarini borib ko‘rgan edi.
Vazirlik rahbariyati ijtimoiy tarmoq faollarini yangi o‘quv yiliga tayyorgarlik borasidagi ishlarga befarq emasligini olqishlab, yurtdoshlarimizdan shu kabi holatlarga guvohi bo‘lganda murojaat kanallari orqali ma’lum qilishlarini so‘rab qoladi.
Ishonch telefoni: 1006
Telegram: @EduuzuniversalBot
Binolardagi pardozlash jarayoni va undan keyingi holat rasmda