Toshkent davlat transport universiteti professor-o‘qituvchilari “Airbus” kompaniyasida stajirovka o‘taydilar
2024-07-04 12:55:00 / Vazirlik yangiliklari
Uchrashuvda “Airbus” kompaniyasi bilan amalga oshirilayotgan loyihalar, uning istiqbollari va o‘zaro manfaatli hamkorlikni rivojlantirish masalalari muhokama qilindi.
Muloqot davomida tomonlar “Airbus” kompaniyasi va O‘zbekiston o‘rtasida ko‘p yillik hamkorlik aloqalari mavjudligini ta’kidlab, birgalikda olib borilayotgan ishlarga to‘xtaldilar. Jak Garrig O‘zbekiston va “Airbus” o‘rtasidagi hamkorlikning ko‘p yillik tarixini yuksak baholab, bu aloqalar nafaqat aviatsiya sohasidagi texnologik rivojlanishni, balki ilm-fan va ta’lim tizimining ham rivojlanishini ta’minlashda muhim ahamiyatga ega ekanligini qayd etdi.
Shu bilan birga, Jak Garrig “Airbus” kompaniyasining Toshkent davlat transport universiteti bilan hamkorlikda muhandislik-texnika yo‘nalishlarida professor-o‘qituvchilar uchun stajirovka tashkil etish istiqbollari o‘rganilayotganini ta’kidladi.
O‘z navbatida, vazir Q.Sharipov bu tashabbus mamlakatimiz ta’lim tizimining zamonaviy talablariga javob beruvchi mutaxassislarni tayyorlashda muhim qadam bo‘lib xizmat qilishini ta’kidladi. Xususan, professor-o‘qituvchilarni xalqaro tajriba asosida stajirovkaga jo‘natish orqali, ular zamonaviy texnologiyalar va uslublarni o‘zlashtirib, o‘quv jarayonlarini yuqori darajada tashkil etish imkoniyatiga ega bo‘ladilar. Bu esa, talabalarning malakasini oshirish va ularni xalqaro mehnat bozorida raqobatbardosh qilish imkonini beradi.
Uchrashuv davomida tomonlar “Airbus” kompaniyasi bilan mavjud hamkorlik aloqalarini yanada mustahkamlash va kengaytirish borasida qator kelishuvlarga erishdilar. Tomonlar o‘zaro manfaatli hamkorlikni rivojlantirish uchun yangi loyihalarni ishlab chiqish va amalga oshirishda davom etish niyatida ekanliklarini bildirdilar.