SamDTUning 2 ta yo‘nalishi diplomi xalqaro darajada tan olinadigan bo‘ldi
2024-05-17 17:15:00 / Vazirlik yangiliklari
Joriy yilning aprel oyida “ECAQA” (Ta’lim va sog‘liqni saqlash sohasida akkreditatsiya va sifatni ta’minlash bo‘yicha Yevrosiyo markazi) mustaqil akkreditatsiya va reyting agentligi tomonidan Samarqand davlat tibbiyot universitetining ta’lim faoliyati sifatini jahon standartlari va mezonlariga muvofiqligi tahlildan o‘tkazildi.
Baholash natijalariga ko‘ra “Davolash ishi” (o‘zbek, rus va ingliz tillaridagi ta’lim) hamda “Stomatologiya” ta’lim dasturlari 5 yil muddatga to‘liq akkreditatsiya qilindi.
Akkreditatsiya sertifikati ayni kunlarda Samarqand davlat tibbiyot universitetida bo‘lib o‘tayotgan “Fundamental, amaliy tibbiyot va farmatsiya yutuqlari” mavzusida talabalar va yosh olimlarning 78-xalqaro ilmiy-amaliy konferensiyasi doirasida Qozog‘istonning Samarqand shahridagi konsuli Abzal Nurashov tomonidan rektor Jasur Rizayevga tantanali ravshda topshirildi.
Ta’kidlash joiz, xalqaro akkreditatsiyadan o‘tganlik to‘g‘risidagi guvohnoma ta’lim va xizmatlarning sifati, ularning xalqaro talablarga muvofiqligi kafolatlarini tasdiqlaydi va ushbu dasturlar bo‘yicha oliy ta’lim to‘g‘risidagi diplom butun dunyoda tan olinadi.