Agentlik rahbaryati hamda pillani qayta ishlash klaster korxonalari rahbarlari ishtirokida yig‘ilish bo‘lib o‘tdi.
2026-11-19 19:10:00 / Yangiliklar

2026-yil 19-noyabr kuni O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktori Nozimjon Xolmurodov rahbarligida mamlakatimizda faoliyat yuritayotgan pillani qayta ishlash klaster korxonalari rahbarlari ishtirokida yig‘ilish bo‘lib o‘tdi.
Yig‘ilishda ipakchilik sohasidagi klaster korxonalarining mavjud texnologik uskunalari, yillik ishlab chiqarish quvvatlari, ulardan samarali foydalanish darajasi, korxonalarni pilla xomashyosi bilan ta’minlash hamda 2027-yilda pilla yetishtirish va qayta ishlash hajmlarini o‘zaro muvofiqlashtirish masalalari muhokama qilindi.
Shuningdek, hududlardagi pillani qayta ishlash klaster korxonalarining ishlab chiqarish imkoniyatlarini to‘liq ishga solish, mavjud quvvatlardan foydalanish samaradorligini oshirish, xomashyoga bo‘lgan yillik ehtiyojni aniqlash va pilla yetkazib berish hajmlarini korxonalarning real ishlab chiqarish quvvatlaridan kelib chiqqan holda rejalashtirishga alohida e’tibor qaratildi.
Yig‘ilish davomida klaster korxonalari rahbarlari tomonidan ishlab chiqarish va eksport hajmlarini oshirishga to‘sqinlik qilayotgan muammolar, xomashyo ta’minoti, texnologik quvvatlardan foydalanish hamda sohani yanada rivojlantirish yuzasidan takliflar bildirildi.
Muhokamalarda 2027-yilda pilla yetishtirish va uni qayta ishlash jarayonlari o‘rtasidagi uzviy bog‘liqlikni ta’minlash, klaster korxonalarining mavjud quvvatlari va xomashyoga bo‘lgan ehtiyojini inobatga olgan holda ishlab chiqarish hajmlarini rejalashtirish muhimligi ta’kidlandi.
Yig‘ilish yakunida ko‘tarilgan masalalar va bildirilgan takliflarni umumlashtirish, mavjud muammolarni hal etish bo‘yicha tegishli chora-tadbirlarni ishlab chiqish hamda klaster korxonalarining ishlab chiqarish salohiyatidan samarali foydalanish yuzasidan vazifalar belgilab olindi.






