Yengil sanoatni rivojlantirish agentligida “Huquqiy zakovat” intellektual o‘yini tashkil etildi.
2026-10-31 16:50:00 / Yangiliklar
O‘zbekiston Respublikasi Vazirlar Mahkamasining 824-son qarori hamda 202-son qarorining 22-bandi ijrosini ta’minlash maqsadida bugun O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi Kasaba uyushmasi tomonidan xodimlar o‘rtasida “Huquqiy zakovat” intellektual o‘yini o‘tkazildi.
Mazkur intellektual bellashuvda Agentlikning tarkibiy boshqarma va bo‘linmalaridan shakllantirilgan 8 ta jamoa o‘zaro bilim, zukkolik, mantiqiy fikrlash va jamoaviy hamjihatlik borasida kuch sinashdi.
Qizg‘in va murosasiz bahslarga boy o‘tgan musobaqa yakunlariga ko‘ra, quyidagi jamoalar g‘oliblikni qo‘lga kiritdi:
1-o‘rin — Charm-poyabzal zonalarini boshqarish direksiyasining “PREMIER” jamoasi;
2-o‘rin — Ishlab chiqarishni tashkil etish va kooperatsiya boshqarmasining “Intellektual klaster” jamoasi;
3-o‘rin — Strategik rejalashtirish va axborot-tahlil boshqarmasining “Jägermeister” hamda Jamg‘arma bo‘limining “SANOATGA MADAD” jamoalari.
Bunday ma’naviy-ma’rifiy va intellektual tadbirlar nafaqat xodimlarning huquqiy savodxonligini oshirish, balki jamoada o‘zaro hurmat, ahillik, birdamlik va sog‘lom raqobat muhitini mustahkamlashda ham muhim ahamiyat kasb etadi.
Shuningdek, mazkur tashabbuslar xodimlarning mustaqil va tanqidiy fikrlash ko‘nikmalarini rivojlantirish, bilimlarini muntazam boyitish, fuqarolik mas’uliyati hamda Vatanga daxldorlik tuyg‘usini yuksaltirishga xizmat qiladi.Zero, bilimli, huquqiy madaniyati yuksak, vatanparvar va hamjihat jamoa — samarali davlat boshqaruvi hamda institutsional taraqqiyotning muhim tayanchidir.
Agentlik jamoasi barcha g‘olib va ishtirokchilarni samimiy tabriklab, kelgusi faoliyatida yangi muvaffaqiyatlar tilaydi!