Finlandiyaning “EPSE Oy” kompaniyasi bosh direktori Youni Yaaskelyaynen bilan uchrashuv bo'lib o'tdi
2026-10-30 20:05:00 / Yangiliklar
2026-yil 30-oktyabr kuni O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktori Nozimjon Xolmurodov Finlandiyaning “EPSE Oy” kompaniyasi bosh direktori Youni Yaaskelyaynen bilan uchrashdi.
Muloqotda yengil sanoat korxonalarida suv resurslaridan samarali foydalanish, oqova suvlarni zamonaviy texnologiyalar asosida tozalash va ekologik barqarorlikni ta’minlash masalalari muhokama qilindi.
“EPSE Oy” sanoat oqova suvlarini, xususan, tarkibida erigan metallar mavjud bo‘lgan suvlarni tozalashga ixtisoslashgan Finlandiya kompaniyasi bo‘lib, uning texnologiyalari Janubiy Afrika, Zambiya va Qozog‘istonda muvaffaqiyatli qo‘llanilgan.
Uchrashuv davomida kompaniyaning suv tozalash reagenti yordamida charmni qayta ishlash, matoni bo‘yash va pardozlash jarayonlarida hosil bo‘ladigan oqova suvlarni tozalash hamda qayta foydalanish imkoniyatlari ko‘rib chiqildi.
Uchrashuv yakunida 3 ta charmni qayta ishlash va 3 ta mato bo‘yash korxonasidan oqova suv namunalarini laboratoriya sinovlari uchun Finlandiyaga yuborishga kelishildi. Sinov natijalari ijobiy bo‘lgan taqdirda, suv tozalash reagentini O‘zbekistonda birgalikda ishlab chiqarish bo‘yicha investitsiya loyihasini amalga oshirish rejalashtirilgan.