BCI Large Farm Week: xalqaro tajriba almashinuvidan ilmiy-amaliy hamkorlik sari
2026-09-29 17:10:00 / Yangiliklar
Better Cotton Initiative Large Farm Week xalqaro haftaligi doirasidagi ishtirokchilar uchun maxsus workshop tashkil etildi.
Workshop davomida O‘zbekiston, Avstraliya, Braziliya, Gretsiya, Turkiya va AQSH vakillari o‘rtasida barqaror paxtachilik, zamonaviy ishlab chiqarish yondashuvlari, xalqaro standartlar hamda paxta yetishtirish samaradorligini oshirish masalalari yuzasidan fikr almashildi.
Tadbir ishtirokchilari o‘z mamlakatlaridagi ilg‘or tajribalar, amaliy yechimlar va paxtachilik sohasidagi zamonaviy yondashuvlar bilan o‘rtoqlashib, o‘zaro hamkorlikning yangi yo‘nalishlarini muhokama qildilar.
Haftalik doirasida “Better Cotton Initiative” delegatsiyasining O‘zbekiston Respublikasi Fanlar akademiyasi Genomika va bioinformatika markaziga tashrifi ham tashkil etildi.
Delegatsiyani Markaz direktori, professor Zabardast Tojiboyevich Bo‘riyev kutib olib, mehmonlarni Markazning ilmiy yo‘nalishlari, laboratoriyalari, seleksiya va qishloq xo‘jaligi ishlab chiqarishiga joriy etilayotgan ilmiy ishlanmalar bilan tanishtirdi.
Tashrif davomida BCI vakillari g‘o‘za genomikasi va biotexnologiyasi, gen muhandisligi, to‘qima madaniyati, bioinformatika va molekulyar seleksiya yo‘nalishlaridagi tadqiqotlar bilan yaqindan tanishdilar.
Xususan, transgenomika va to‘qima madaniyati laboratoriyasida zamonaviy RNK-interferensiya texnologiyasi asosida yaratilgan “Porloq” turkumidagi g‘o‘za navlari namoyish etildi. Ushbu navlarning yuqori hosildorlik, tola sifati va qurg‘oqchilik kabi noqulay sharoitlarga chidamlilik xususiyatlariga alohida e’tibor qaratildi.
Shuningdek, delegatsiyaga markerlar yordamidagi seleksiya (MAS) usullari asosida yaratilgan “Ravnaq-1” va “Ravnaq-2” g‘o‘za navlari taqdim etildi. Zamonaviy molekulyar usullarning istiqbolli genotiplarni aniqlash va yangi navlarni yaratish jarayonini jadallashtirishdagi ahamiyati haqida ma’lumot berildi.
Tashrif yakunida Genomika va bioinformatika markazi rahbariyati, olimlar hamda BCI delegatsiyasi ishtirokida davra suhbati tashkil etildi.
Unda barqaror paxtachilikni rivojlantirish, genetik resurslardan samarali foydalanish, paxta tolasi sifatini oshirish, iqlim o‘zgarishi sharoitida chidamli g‘o‘za navlarini yaratish hamda zamonaviy ilmiy ishlanmalarni ishlab chiqarishga keng joriy etish masalalari muhokama qilindi.
Tomonlar, shuningdek, fan, innovatsiya va barqaror paxtachilikni rivojlantirish yo‘nalishlarida xalqaro hamkorlikni kengaytirish, ilmiy-amaliy tajriba almashish hamda O‘zbekiston paxtasining raqobatbardoshligini oshirish istiqbollari yuzasidan fikr almashdilar.