Uychi tumanida kambag‘allikni qisqartirish va aholi bandligini ta’minlash borasidagi ishlar o‘rganildi
2026-09-10 15:55:00 / Yangiliklar
O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktori Nozimjon Xolmurodov Namangan viloyatiga xizmat safari doirasida Uychi tumanida kambag‘allikni qisqartirish, aholi bandligini ta’minlash va oilalar daromadlarini oshirish borasida amalga oshirilayotgan ishlar bilan tanishdi.
Xizmat safari davomida Keskandiyor, Do‘stlik va Ittifoq mahallalaridagi ijtimoiy himoyaga muhtoj, og‘ir toifadagi oilalar xonadonlarida bo‘lib, ularning turmush sharoiti, mavjud muammolari hamda bandlik va daromad manbalarini kengaytirish imkoniyatlari o‘rganildi.
Muloqotlar davomida har bir oilaning imkoniyat va ehtiyojlaridan kelib chiqib, ularni doimiy daromad manbai bilan ta’minlash, mavjud muammolarni bosqichma-bosqich hal etish hamda tadbirkorlik va kasb-hunarga yo‘naltirish bo‘yicha tegishli tavsiyalar berildi.
Shuningdek, aniqlangan masalalarni mas’ul tashkilotlar bilan hamkorlikda hal etish, oilalarning bandligini ta’minlash va ularning farovonligini oshirishga qaratilgan amaliy choralarni kuchaytirish yuzasidan vazifalar belgilandi.