Asosiy maqsadimiz, yoshlarimizni kasb-hunarli qilish va taʼlim sifatini yangi bosqichga koʻtarish – vazir
2024-04-01 22:20:00 / Vazirlik yangiliklari
Unda vazirlik markaziy apparati masʼullari, tizim tashkilotlari hamda professional taʼlim muassasalari rahbarlari qatnashdi.
Yigʻilishda professional taʼlim sohasini rivojlantirishga berilayotgan alohida eʼtiborga qaramay, koʻpchilik taʼlim muassasalari direktorlari va hududiy boshqarmalar xodimlari oʻz lavozim vazifalariga sustkashlik bilan yondashayotgani qayd etildi. Ayrim direktorlar va direktor oʻrinbosarlari koʻp yillar davomida rahbar lavozimda faoliyat yuritayotganiga qaramay oʻz ustida ishlamay qoʻygani, tizimni rivojlantirish, yangi gʻoyalar olib kirish, taʼlim sifatini taʼminlash borasida jonbozlik va tashabbus koʻrsatmayotgani tanqid qilindi.
Yigʻilishda qayd etilganidek, joriy yil yanvar fevral oylarida vazirlik ishchi guruhi tomonidan hududlardagi 179 ta professional taʼlim muassasasidagi holat joyiga chiqqan holda oʻrganildi. Oʻrganish oʻtkazilgan professional taʼlim muassasalari rahbarlari ishni toʻgʻri tashkil qilmaganligi sababli taʼlim muassasalarining mavjud quvvatlaridan samarali foydalanish holati talab darajasida emasli taʼkidlandi.
25 ta taʼlim muassasasi 2023/2024 oʻquv yili uchun oʻquvchilarni qabul qilish rejalarini bajarish koʻrsatkichi 70 foizga ham yetmagan. Oʻrganilgan taʼlim muassasalari direktorlari tomonidan 163 nafar nomutaxassis oʻqituvchilarga dars soatlari taqsimlab berilgan.
– Nomutaxassis boʻlgan pedagog dars oʻtayotgan fani boʻyicha yetarli bilim va malakaga ega boʻlmasdan turib, qanday qilib oʻquvchilarga ushbu fanni oʻrgatishi, taʼlim sifatini oshirishi mumkin? – dedi Q.Sharipov.
Yuqoridagi kabi xato va kamchiliklarga yoʻl qoʻygan, mavjud kamchiliklarni bila turib, ularni bartaraf qilish oʻrniga koʻz yumayotgan bir qancha rahbarlarga nisbatan tegishli choralar koʻrildi. Jumladan, 5 nafar direktor va 48 nafar direktor oʻrinbosari lavozimidan ozod etildi, 265 nafar direktor va direktor oʻrinbosariga nisbatan “hayfsan” intizomiy chorasi qoʻllandi.
Shuningdek, yigʻilishda bitiruvchilar bandligini taʼminlash, professional taʼlim va ish beruvchilar hamkorligini yoʻlga qoʻyish, taʼlim sifatini oshirish masalalari muhokama qilindi.
“Ish beruvchi korxonalarni koʻproq jalb qilgan holda integratsiyani taʼminlash, dual taʼlimning ish beruvchi va korxonalar uchun manfaatli jihatlari hamda xorijiy tajribalarni tizimga joriy qilish orqali yoshlarimizni zamonaviy kasblarga oʻrgatish va taʼlim sifatini yangi bosqichga koʻtarishga erishishimiz mumkin”, – dedi vazir.
Yigʻilish yakunida oʻrganishda qamrab olinmagan taʼlim muassasalaridagi mavjud muammolarni joyida bartaraf qilish, ularga uslubiy yordam koʻrsatish maqsadida qolgan taʼlim muassasalarini ham joyiga chiqqan holda kompleks oʻrganish yuzasidan masʼullarga topshiriq berildi.