Yoshlar ishlari agentligi tomonidan “Kelajak: ilmli qizlar hamjamiyati” noan’anaviy kreativ forumi tashkil etildi. Unda 200 nafarga yaqin yosh xotin-qizlar ishtirok etdi.

“Kelajak: ilmli qizlar hamjamiyati” ta’lim almashinuv dasturi O‘zbekiston Respublikasining 2030-yilgacha gender tenglikka erishish strategiyasi doirasida amalga oshirilayotgan muhim tashabbuslardan biri bo‘lib, qizlarni ta’lim olishga yo‘naltirish, ularning ijtimoiy faolligini oshirish hamda yetakchilik qobiliyatlarini rivojlantirishga qaratilgan.

Mazkur ta’lim almashinuv dasturi 2021-yilda o‘z faoliyatini boshlagan. Bugungi kunga qadar 1869 nafar yosh xotin-qizning bilim va ko‘nikmalarini oshirishga xizmat qildi.

Jumladan, dastur doirasida yosh xotin-qizlar oliy ta’lim imkoniyatlari – GPA tizimi, stipendiya olish uchun hujjatlar tayyorlash, xalqaro universitetlarga hujjat topshirish borasidagi bilimlarga ega bo‘ldi.

Shuningdek, ilmiy faoliyatda maqola yozish va chop etish, ilmiy tahririyat usullari, tadqiqotlar olib borish CV va rezyume yozish – ishga joylashish va akademik faoliyat uchun hujjat tayyorlash, xalqaro loyihalar va almashinuv dasturlari, grant va stipendiyalar, intervyuga tayyorgarlik bosqichlari, loyihalarni yaratish va startaplar, innovatsion g‘oyalarni amalga oshirish, moliyalashtirish va huquqiy masalalar, volontyorlikda global dasturlar va ijtimoiy tashabbuslarda ishtirok etish hamda zamonaviy texnologiyalarda onlayn ta’lim platformalaridan foydalanish yo‘llarini o‘rgandi.

Shu bilan birga, liderlik, muloqot, jamoaviy ish ko‘nikmalarini rivojlantirish bo‘yicha ta’lim oldi. Forum yakunida “Kelajak: ilmli qizlar hamjamiyati” ta’lim almashinuv dasturining bitiruvchilari sertifikat hamda esdalik sovg‘alari bilan taqdirlandi.