COP31: Ўзбекистон Марказий Осиёда сув ва иқлим хатарларига бардошлиликни ошириш ташаббусларини илгари сурмоқда
2026-11-12 09:50:00 / Янгиликлар

Нуфузли анжуманда иқлим ўзгаришига қарши курашиш, унинг оқибатларига мослашиш, Париж битими мақсадларига эришиш, иқлим лойиҳаларини молиялаштириш ҳамда «яшил иқтисодиёт»га ўтишни жадаллаштириш масалалари муҳокама қилинмоқда.
11 ноябрь куни Ўзбекистон Республикаси Президенти Шавкат Мирзиёев COP31 доирасидаги Жаҳон иқлим саммитининг очилиш маросимида иштирок этди.
Анжуманда сув ресурслари тақчиллиги, музликларнинг эриши, қурғоқчилик ва глобал исиш оқибатларига мослашиш каби Марказий Осиё учун долзарб масалалар ҳам алоҳида ўрин тутмоқда.
Мазкур халқаро анжуман доирасидаги тадбирларда Сув хўжалиги вазири ўринбосари Рустам Қаршиев бошчилигидаги вазирлик делегацияси ҳам иштирок этмоқда.
Хусусан, Ўзбекистон павильонида Сув хўжалиги вазирлиги, БМТ Тараққиёт дастури (БМТТД) ҳамда Экология ва иқлим ўзгариши миллий қўмитаси ҳамкорлигида «Мослашувдаги тафовутни бартараф этиш: Марказий Осиёда сув ва иқлим хатарларига бардошлилик бўйича ҳаракатлар кун тартиби» мавзусида ён тадбир ташкил этилди.
Тадбирни Рустам Қаршиев ва БМТТДнинг Сиёсат ва дастурларни қўллаб-қувватлаш бюроси вакили Клаудия Ортис кириш сўзи билан очди.
Вазир ўринбосари иқлим ўзгаришининг Марказий Осиёдаги таъсири, аввало, сув ресурслари орқали намоён бўлаётганини таъкидлади. Шунингдек, Ўзбекистонда сув тежовчи технологияларни кенг жорий этиш, сув ҳисобини рақамлаштириш ва насос ускуналарини модернизация қилиш борасида амалга оширилаётган ишлар ҳақида маълумот берди.
Муҳокамаларда иқлим ўзгаришига бардошли сув инфратузилмасини ривожлантириш, эрта огоҳлантириш тизимларини такомиллаштириш, аҳоли саломатлигини муҳофаза қилиш ва инвестицияларни жалб этиш масалаларига эътибор қаратилди.
БМТТДнинг Оролбўйидаги амалий тажрибаси, жумладан, Япония Ҳукумати кўмагида амалга оширилаётган қўшма лойиҳа натижалари ҳам кўриб чиқилди.
Тадбирда Ўзбекистонда амалга оширилаётган «Сувчилар мактаби» лойиҳасига алоҳида эътибор қаратилди. Рустам Қаршиев аҳоли, айниқса, ёшлар ўртасида сувдан оқилона фойдаланиш маданиятини шакллантириш, билим ва кўникмаларни ошириш иқлим ўзгаришига мослашишнинг муҳим шартларидан эканини таъкидлади.
Муҳокамалар якунида қўшма мониторингни йўлга қўйиш, маълумот алмашинувини кенгайтириш ҳамда «Анталия – Абу-Даби» кун тартиби доирасида истиқболли инвестиция лойиҳаларини биргаликда тайёрлаш масалалари белгилаб олинди.
Сув хўжалиги вазирлиги Ахборот хизмати

