Сув хўжалиги вазирлиги ходимлари учун 2026 йилнинг IV чорагида ўтказилиши режалаштирилган иқтисодий ўқиш доирасида ижро интизоми танқидий муҳокама қилинди
2026-10-26 18:00:00 / Янгиликлар
Видеоконференцалоқа шаклида ташкил этилган йиғилишга Сув хўжалиги вазири Шавкат Хамраев раислик қилди. Унда вазир ўринбосарлари, марказий аппарат, республика ва ҳудудий ташкилотлар раҳбарлари иштирок этди.
Унда Президентимиз, Президент Администрацияси раҳбари ва Вазирлар Маҳкамасининг ҳужжатлари билан вазирликка юклатилган вазифалар ижроси, “Ijro.gov.uz” электрон тизимидаги топшириқларнинг бажарилиш ҳолати атрофлича таҳлил қилинди.
Қайд этилганидек, октябрь ойи дастлабки якунларига кўра, Давлат раҳбарининг 136 та топшириғидан 133 таси ёки 97,8 фоизи бажарилган. Президент Администрацияси раҳбарининг 57 та ва Вазирлар Маҳкамасининг 41 та ҳужжати билан юклатилган топшириқлар ижроси тўлиқ таъминланган.
Шу билан бирга, айрим топшириқлар ижросида йўл қўйилган сусткашлик ва камчиликлар танқидий кўриб чиқилди. Ҳар бир раҳбар ўз йўналишидаги вазифаларнинг белгиланган муддатларда, тўлиқ ва сифатли бажарилиши учун шахсан жавобгар экани таъкидланди.
Йиғилишда ноябрь ойида ижроси таъминланиши лозим бўлган 247 та топшириқ, жумладан, Давлат раҳбарининг 201 та, Президент Администрацияси раҳбарининг 20 та ва Вазирлар Маҳкамасининг 26 та топшириғини бажариш юзасидан аниқ вазифалар белгиланди. Ноябрь ойидаги топшириқларни 25 ноябрга, декабрь ойидагиларни эса 20 декабрга қадар бажариш, ижро ҳолатини кунбай назорат қилиш зарурлиги қайд этилди.
Кун тартибидаги масалалар юзасидан Қорақалпоғистон Республикаси Cув хўжалиги вазирлиги ва вилоятлар ирригациялари ҳавза бошқармалари бошлиқларининг ҳисоботлари, фикр-мулоҳазалари тингланди.
Шундан сўнг вазир ўринбосари Рустам Қаршиев раислигида ижро интизомига бағишланган ўқув-семинар бўлиб ўтди. Унда Вазирлар Маҳкамаси ва Адлия вазирлиги вакиллари иштирок этиб, топшириқлар ижросини ташкил этишда учраётган хато ва камчиликлар, уларни бартараф этиш йўллари ҳамда электрон тизимда ишлаш тартиби юзасидан тушунтиришлар берди.
Тадбир якунида ижро интизомини янада мустаҳкамлаш, ҳар бир топшириқ бўйича тизимли назорат ўрнатиш, масъулларнинг шахсий жавобгарлигини кучайтириш ва белгиланган вазифаларнинг сўзсиз бажарилишини таъминлаш бўйича тегишли топшириқлар берилди.
Ахборот хизмати