ГЕРМАНИЯНИНГ “LEMAN SWMS INVESTMENT” КОНСОРЦИУМИ БИЛАН 19 ТА НАСОС СТАНЦИЯСИНИ МОДЕРНИЗАЦИЯ ҚИЛИШ БЎЙИЧА БИТИМ ИМЗОЛАНДИ
2026-06-19 15:35:00 / Янгиликлар
Ушбу битим Ўзбекистон Республикаси Сув хўжалигини ривожлантиришнинг 2020–2030 йилларга мўлжалланган концепциясининг мақсад ва устувор йўналишлари доирасида амалга оширилаётган “19 та йирик насос станциясини модернизация қилиш, Сув хўжалиги вазирлиги тизимидаги насос станцияларининг ўз эҳтиёжлари учун электр энергияси билан таъминлаш мақсадида қуёш электр станциялари ва энергия сақлаш тизимларини қуриш” инвестиция лойиҳасининг энергетика таркибий қисмини ташкил этади.
Лойиҳа доирасида қарийб 940 млн. АҚШ доллари миқдорида инвестицияларни жалб этиш назарда тутилган бўлиб, у насос станцияларининг энергия самарадорлигини ошириш, давлат бюджетига тушадиган юкламани камайтириш, замонавий сув инфратузилмасини ривожлантириш ҳамда насос станцияларининг энергияга бўлган эҳтиёжларини қоплашда қайта тикланувчи энергия манбалари улушини оширишга қаратилган.
2027–2030 йилларда амалга ошириш режалаштирилган лойиҳа доирасида замонавий технологик ва муҳандислик ечимлари, жумладан, Германиянинг “PSE Engineering GmbH” компанияси томонидан тақдим этиладиган муҳандислик ишланмалари, Германиянинг “SMA Solar GmbH” компанияси инвертор ускуналаридан, шунингдек, қуёш электр станциялари учун пойдеворлар ва трекер тизимлари бўйича АҚШнинг “NextPower” компанияси технологиялари, шунингдек, “Leman SWMS Investment” консорциумининг маҳаллий ҳамкори сифатида UET Group (хусусан, “ЎЗБЕКЕНЕРГОТАЪМИР” АЖ) иштирокида фойдаланиш кўзда тутилмоқда.
Насос ускуналарини модернизация қилиш жараёнида насос ва унга алоқадор ускуналарни ишлаб чиқарувчи бир қатор йирик халқаро ишлаб чиқарувчилар, жумладан, KSB SE & Co. KGaA компаниясини жалб этиш кутилмоқда.
Лойиҳани молиялаштиришда Германиянинг йирик банкларидан бири ҳисобланган DZ Bankни ўз ичига олган Германиянинг йирик банклари синдикати иштирок этиши кутилмоқда.
Мазкур лойиҳанинг амалга оширилиши насос инфратузилмасини модернизация қилиш, сув хўжалиги тизимининг барқарорлигини мустаҳкамлаш ҳамда соҳага энергия тежамкор технологияларни жорий этиш йўлидаги муҳим қадам бўлиб хизмат қилади.
Ахборот хизмати