Ўзбекистон Бош вазири Урумчи шаҳрида Шинжон-Уйғур автоном райони Партқўми котиби билан учрашди

Мазкур ЭКСПОда фахрий меҳмон сифатида Қирғизистон Бош вазири, Қозоғистон Бош вазирининг ўринбосари, шунингдек, 40 дан ортиқ хорижий ҳукуматлар вакиллари иштирок этиши кутилмоқда.

Ўзбекистон Республикаси Президенти Шавкат Мирзиёевнинг топшириқларига асосан, Бош вазир бошчилигидаги мамлакатимиз ҳукумати делегацияси мазкур тадбирда қатнашиш учун Урумчи шаҳрига ташриф буюрди.

Бугун, 25 июнь куни Урумчи шаҳрига ташриф доирасида Ўзбекистон Республикаси Бош вазири Абдулла Арипов ва Хитой Коммунистик партияси Марказий қўмитаси Сиёсий бюроси аъзоси, Шинжон-Уйғур автоном райони Партқўми котиби Ма Синжуй бошчилигида икки томонлама учрашув ўтказилди.

Учрашувда Ўзбекистон ва Хитой ўртасидаги дўстона ҳамда кўп қиррали шериклик муносабатлари юқори даражада ривожланиб бораётгани, бунда Ўзбекистон Республикаси Президенти Шавкат Мирзиёев ва Хитой Халқ Республикаси Раиси Си Цзиньпин ўртасидаги яқин, самимий ва биродарлик ришталари муҳим аҳамият касб этаётгани таъкидланди.

Айниқса, жорий йилнинг 6 июнь куни Пекин шаҳрида “Хитой-Қирғизистон-Ўзбекистон” темир йўли қурилишини амалга ошириш тўғрисидаги Ҳукуматлараро битимнинг имзоланиши ва бу маросимда давлатларимиз раҳбарларининг видео-мурожаат билан иштирок этишгани чинакам тарихий воқеа бўлди.

Қайд этилганидек, ҳудудлараро ҳамкорликни янада ривожлантириш, Шинжон ва Ўзбекистон ўртасидаги товар айирбошлаш ҳажмини кескин ошириш икки томонлама муносабатларда муҳим аҳамият касб этади.

Шу мақсадда, Шинжоннинг етакчи компанияларини энергетика, фойдали қазилмаларни чуқур қайта ишлаш, машинасозлик, кимё саноати, фармацевтика, қишлоқ хўжалиги ва қурилиш материаллари ишлаб чиқариш соҳаларидаги лойиҳаларни Ўзбекистонда амалга ошириш таклиф этилди.

Шунингдек, маданий-гуманитар, илм-фан, таълим, туризм ва бошқа соҳаларда ҳамкорликни чуқурлаштириш юзасидан ҳам ўзаро фикр алмашилди.