Тақсимлаш электр тармоқларидан фойдаланиш қоидалари тасдиқланди
2024-10-11 15:15:00 / Янгиликлар
Вазирлар Маҳкамасининг 2024 йил 9 октябрда “Тақсимлаш электр тармоқларидан фойдаланиш қоидаларини тасдиқлаш тўғрисида”ги 652-сон қарори қабул қилинди.
Мазкур қарор билан тасдиқланган қоидалар тақсимлаш электр тармоқларидан оқилона ва шаффоф фойдаланиш орқали барча иштирокчиларга тенг шарт-шароитлар яратиш, тақсимлаш тизимини хавфсиз ва ишончли эксплуатация қилиш ва уни ривожлантириш, якуний истеъмолчилар электр таъминотининг ишончлилиги ва барқарорлигини таъминлаш, узилишларни олдини олиш ҳамда электр энергияси сифатини таъминлаш, истеъмолчиларнинг талабига жавоб берадиган электр энергиясини етказиб беришдаги муносабатларни тартибга солади.
Қоидалар тармоққа уланишга нисбатан қўлланиладиган қоидалар, тизимни тартиблаштириш бўйича зарур шартлар ва тартиб-таомилларни, кичик қувватли қайта тикланувчи энергия манбаларини тақсимлаш тизимига интеграция қилиш билан боғлиқ муносабатларни ҳамда фавқулодда вазиятларда тизим ишончлилигини таъминлаш мезонларини белгилайди.
Шунингдек, тизимда ақлли тармоқлар ва замонавий инфратузилмани яратиш учун янги технологиялар ва инновацияларни жорий этиш юзасидан умумий талабларни ўрнатади.
Ушбу қарор расмий эълон қилинган кундан эътиборан уч ой ўтгач кучга киради.