БМТ Бош котиби Антониу Гутерриш Юқори Чирчиқ туманида барпо этилаётган қуёш фотоэлектр станциясида бўлди
2024-07-01 17:00:00 / Янгиликлар
Бугун, 1 июль куни БМТ Бош котиби Антониу Гутерриш Тошкент вилоятининг Юқори Чирчиқ туманида Саудия Арабистонининг “ACWA Power” компанияси томонидан қурилаётган, жами қуввати 200 МВт бўлган қуёш фотоэлектр станцияси фаолияти билан танишди.
Мазкур қуёш фотоэлектр станцияси 460 гектар бўш ер майдонида бунёд этилган бўлиб, унда қуввати 334 МВт бўлган электр энергиясини сақлаш тизими ҳам жорий этилмоқда.
Ушбу станциянинг 100 МВт қисми жорий йил 2 май куни Тошкент халқаро инвестиция форуми доирасида ишга туширилган эди.
Ушбу станциянинг қолган 100 МВт қисми 15 июлга қадар ишга туширилади.
Станция тўлиқ ишга туширилгач, йилига 430 миллион кВт·соат электр энергияси ишлаб чиқарилади.
Мазкур ҳажмдаги электр энергияси эса юртимиздаги 179 мингдан ортиқ хонадоннинг бир йиллик истеъмолига тенгдир.
Ушбу электр станциясининг ишга туширилиши натижасида йилига 130 миллион кубометр табиий газ захиралари тежалади. Қолаверса, атмосферага 176 минг тонна зарарли газлар чиқишининг олди олинади.
Яна бир аҳамиятли жиҳати, станция қурилиши даврида 800 та, лойиҳа тўлиқ қувват билан ишга тушгандан кейин эса 30 та янги иш ўрни яратилади.
Таъкидлаш жоизки, қиймати 400 миллион АҚШ доллари бўлган ушбу йирик ҳажмдаги лойиҳа Саудия Арабистонининг “ACWA Power” компанияси томонидан тўғридан-тўғри инвестиция мавлағлари ҳисобидан амалга оширилмоқда.