Камбағалликни қисқартириш ва бандлик вазирлиги фаолиятининг 9 ойлик натижалари юзасидан матбуот анжумани
2026-10-28 09:00:00 / Матбуот анжуманлари
Камбағаллик даражаси 3,6 фоизгача пасайди
Ўзбекистон Республикаси Президенти Администрацияси ҳузуридаги ОАВ учун контент тайёрлаш марказида Камбағалликни қисқартириш ва бандлик вазирлигининг тўққиз ойлик фаолияти якунларига бағишланган матбуот анжумани бўлиб ўтди. Унда вазирнинг биринчи ўринбосари Марат Жўраев асосий натижаларни тақдим этди.
Ҳисобот даврида камбағаллик даражаси 5,8 фоиздан 3,6 фоизгача пасайди. Камбағалликдан холи маҳаллалар сони 1 435 тадан 3 627 тага етди. "Ижтимоий реестр"даги 429 мингта оилага даромадини оширишга қаратилган 581 мингта хизмат кўрсатилди, даромади ошган 440 мингта оила реестрдан чиқарилди.
Бандлик ва касбга ўқитиш
Тўққиз ой давомида 824 минг нафар фуқаро доимий ишга жойлаштирилди, 4 миллион 141 минг нафар аҳолининг даромадини оширишга кўмаклашилди ва 980 минг нафар фуқаронинг норасмий бандлиги расмийлаштирилди.
Касбга ўқитишга 96,4 минг киши жалб қилинди. Ўқишни тамомлаган 59,2 минг нафар битирувчидан қарийб 45 минги иш билан таъминланди. Ваучер тизими орқали қарийб 130 минг кишига ваучер ажратилиб, 95 мингдан ортиғи ўқишга жалб қилинди. Ўқишни тамомлаган 56,5 минг кишидан 43 мингдан ортиғи иш билан таъминланди.
Шунингдек, 23 та касб ва лавозимни қамраб олган 7 та касбий стандарт ҳамда 2026–2030 йилларга мўлжалланган Муносиб меҳнат бўйича мамлакат дастури, келажак касблари атласи, "яшил" бандликни баҳолаш методологияси ва меҳнат бозорининг миллий индикаторлар тизими ишлаб чиқилди.
Ходимлар ҳуқуқларини ҳимоя қилиш
Давлат меҳнат инспекцияси томонидан 15,1 мингта назорат тадбири ўтказилиб, 36,1 мингта қонунбузилиш ҳолати аниқланди. Қонунбузилишларни бартараф этиш юзасидан 5 666 та ёзма кўрсатма ва 247 та тақдимнома киритилиб, мансабдор шахсларга 22,3 миллиард сўм маъмурий жарима қўлланилди.
Инспекция аралашуви билан қарийб 35 минг нафар ходимга 832,1 миллиард сўмдан ортиқ иш ҳақи ундириб берилди, 4 467 фуқаронинг меҳнат ҳуқуқлари тикланди. Иш ҳақи бўйича судларга киритилган даъволар асосида қарийб 29,5 миллиард сўм ундирилди. Ишга тиклаш бўйича суд қарорлари асосида 158 нафар фуқаро ишга тикланди.
Меҳнат хавфсизлиги ва мажбурий меҳнат
Меҳнат фаолияти билан боғлиқ 692 та бахтсиз ҳодиса махсус текширилди. Оқибатда 758 нафар фуқаро жабрланган, жумладан, 205 нафари вафот этган. Суд қарорлари асосида 16 миллиард сўмдан ортиқ товон пули ундирилди.
Мажбурий меҳнатга оид 47 та ҳолат аниқланиб, айбдор мансабдор шахсларга 1,5 миллиард сўм жарима қўлланилди.
Мурожаатлар, рақамлаштириш ва халқаро ҳамкорлик
Жорий йилнинг тўққиз ойида вазирлик ва унинг тизим ташкилотларига 63 315 та мурожаат келиб тушди. Бу ўтган йилнинг шу даврига нисбатан 24 756 тага (28 %) камайган. Мурожаатларнинг 45 143 таси (71 фоизи) қаноатлантирилди, 17 791 таси (28 фоизи) ҳуқуқий тушунтириш орқали ҳал этилди.
"Онлайн маҳалла" электрон платформаси орқали 7 730 та субсидия ва 8 835 та ссуда аризаси бўйича ижобий қарор қабул қилинди. Натижада 64,1 миллиард сўм субсидия ва 79,8 миллиард сўм ссуда ажратилди. Бу ўтган йилга нисбатан субсидияларда 58,4 фоиз, ссудаларда эса 31,4 фоиз ўсишни кўрсатади.
Вазирлик Халқаро меҳнат ташкилоти, Жаҳон банки, БМТ Тараққиёт дастури, Осиё тараққиёт банки, Швейцария Тараққиёт ва ҳамкорлик агентлиги, Туркия Ҳамкорлик ва мувофиқлаштириш агентлиги (TIKA) ҳамда Германия халқаро ҳамкорлик ташкилоти билан ҳамкорликни кенгайтирди.
Касбий малакаларни халқаро стандартлар асосида баҳолаш, сунъий интеллект ёрдамида касбга йўналтириш, "яшил" иқтисодиёт учун мутахассислар тайёрлаш ва ижтимоий суғурта тизимини ривожлантириш бўйича келишувларга эришилди.
Мазкур ташаббуслар доирасида хотин-қизлар тадбиркорлигини қўллаб-қувватлаш, муносиб иш ўринларини яратиш, меҳнат ҳуқуқларини ҳимоя қилиш ва гендер тенглигини таъминлашга қаратилган 14 та истиқболли лойиҳага грантлар ва техник кўмак ажратилди.