Ўзбекистон Республикаси Камбағалликни қисқартириш ва бандлик вазирлиги

Айтиш керакки, жорий йилги Давлат дастурида Камбағалликни қисқартириш ва бандлик вазирлигига ҳам қатор вазифалар юклатилган.

Хусусан, Фармон ва Давлат дастури билан вазирлик зиммасига жами 29 та, шундан, асосий ижрочи сифатида 14 та ва ҳам ижрочи сифатида 13 та бандда топшириқлар берилган.

Жорий йилнинг 1-ярим йиллигида вазирлик асосий ижрочи сифатида белгиланган 6 та банд тўлиқ бажарилди. Жумладан, аҳолини даромадли меҳнат билан банд қилиш, ижтимоий суғурта тизимини такомиллаштириш доирасида 2 та меъёрий-ҳуқуқий ҳужжат лойиҳаси ишлаб чиқилди.

Шу билан бирга, жорий йилнинг 6 ойида 4 та амалий чора-тадбирлар бажарилди. Хусусан, хотин-қизлар тадбиркорлигини қўллаб-қувватлаш, хотин-қизлар тадбиркорлик марказлари фаолиятини такомиллаштириш мақсадида  ҳудудлардаги 14 та “Хотин-қизлар тадбиркорлик марказлари”да СММ, мобил графика, IТ, веб дизайнер каби замонавий касблар бўйича ўқитиш йўлга қўйилди.

Ушбу марказларда жорий йилда 89 минг нафар хотин-қизни
касб-ҳунарга ва тадбиркорликка, 50 минг нафар хотин-қизни IТ йўналишида ўқитиш бўйича режалар ишлаб чиқилди.

Мазкур марказларда 15 та йўналишда икки ойгача бўлган ўқув курслари ташкил этилиб, 6 ойда жами 44 минг нафар аёллар касб-ҳунарга ўқитилди.

Оила ва хотин-қизларни қўллаб-қувватлаш давлат мақсадли жамғармаси маблағлари ҳисобидан марказларнинг ўқитиш фаолияти билан боғлиқ 3,8 млрд сўмлик харажатлари қоплаб берилди.

Белгиланган топшириққа асосан жорий йилнинг апрель ойида “Ишсиз ва ишга жойлаштиришга муҳтож аҳолининг ва норасмий бандларнинг манзилли рўйхатини шакллантириш услубиёти” ишлаб чиқилди.

Аҳоли бандлиги дастурини шакллантириш ва ижросини электрон ахборот тизими орқали онлайн мониторинг қилиб бориш мақсадида вазирликнинг “yangiish.mehnat.uz”электрон платформаси ишга туширилди.   Платформада ташкил этиладиган иш ўринлари ҳисобини лойиҳалар кесимида онлайн кузатиб бориш, яратилган иш ўринларининг ҳаққонийлигини солиқ органлари орқали мониторинг қилиб бориш имконияти яратилди.

Платформада шакллантирилган маълумотларга кўра, жорий йилнинг январь-июнь ойларида 2,9 млн (режага нисбатан 127%) аҳолининг даромадли иш билан таъминланганлиги солиқ органларидан рўйхатдан ўтказилди. жумладан:

– хизмат кўрсатиш соҳасида 1 млн 274 минг нафар (130%);

– қишлоқ хўжалиги йўналишида 1 млн 532 минг нафар (124%);

– қурилиш соҳасида 85 минг нафар (138%);

– инвестиция лойиҳаларини ишга тушириш орқали 49 минг (115%) аҳоли юқори даромадли иш билан таъминланди.

Бундан ташқари, ижро муддати кейинги ойлар ва йил якунига қадар бўлган 9 та вазифа ижроси бўйича ҳам тизимли ишлар олиб борилмоқда.

Хусусан, ногиронлиги бўлган шахсларга муносиб иш ўринлари яратиш орқали улар бандлигини таъминлашни 2 баробарга ошириш белгиланган.
Шу мақсадда, жорий йилнинг январь-июль ойларида 14,2 минг нафар ногиронлиги бўлган шахслар бандлигига кўмаклашилди. Қолаверса, жорий йилнинг 7 ойида 3 976 нафари касб-ҳунарга ўқитишга жалб қилинди.

Ногиронлар бандлигини таъминлаш кўрсаткичи ўтган йилнинг мос даврига нисбатан 1,4 бараварга оширилди.

Хорижда вақтинча меҳнат фаолиятини амалга ошириш учун чиқиб кетган хотин-қизларнинг ҳуқуқ ва қонуний манфаатларини ҳимоя қилишга ҳам алоҳида эътибор қаратилмоқда. Жорий йил бошидан Миграция агентлигининг хориждаги ваколатхоналари, вакилликлар ва ҳудудий филиаллар томонидан меҳнат фаолиятини амалга ошириш учун хорижга чиқиб кетган 7 401 нафар хотин-қизларнинг ҳуқуқлари ва қонуний манфаатларини ҳимоя қилиш бўйича ёрдамлар кўрсатилган.

 Хотин-қизларни меҳнат бозорида рақобатбардош касб-ҳунарларга ўқитиш орқали бандлигини таъминлашга кўмаклашиш ҳамда улар ўртасида тадбиркорликни ривожлантириш юзасидан қўйилган вазифа доирасида  жорий йилнинг 7 ойида вазирлик тасарруфидаги касбий таълим муассасалари томонидан зарур касбий малакага эга бўлмаган 79 минг нафар хотин-қиз меҳнат бозорида талаб юқори бўлган касбларга ўқитишга жалб қилинди.

Давлат дастурида 423 минг ишсиз аҳолини ишга жойлаштиришга кўмаклашиш вазифаси белгиланган бўлиб, жорий йилнинг 7 ойида Бандлик бўлимлари ҳамда ҳоким ёрдамчилари томонидан жами 267 минг нафар (режага нисбатан 63 фоиз) ишсиз юртдошларимиз бўш иш ўринларига  жойлаштирилди.

Шунингдек, дастурда банд бўлмаган шахсларни, камбағал оилаларнинг ишсиз аъзолари ва ёшларни Мономарказлар, давлат ва нодавлат таълим муассасаларида касб-ҳунар, хорижий тиллар ва тадбиркорлик кўникмаларига ўқитиш орқали бандлигига кўмаклашиш вазифаси белгиланган бўлиб, мазкур топшириқ ижросини таъминлаш мақсадида вазирлик тасарруфидаги касбий таълим муассасалари томонидан зарур касбий малакага эга бўлмаган 138 минг ишсизлар ўқишга жалб қилинди.

 Мазкур Давлат дастури билан, вазирликка мамлакатда камбағаллик даражасини камайтириш, ишсизлар, айниқса хотин-қизларни меҳнат бозорида рақобатбардош касб-ҳунар ва хорижий тилларга ўқитиш, ишсиз аҳолини муносиб ишга жойлаштириш, меҳнат миграцияси каби устувор вазифалар юклатилган бўлиб, йил охирига қадар дастурда белгиланган вазифаларнинг ижроси сўзсиз таъминланади.