Камбағалликни қисқартириш ва бандлик вазирлигида марказий аппарат, вазирлик ҳузуридаги ташкилотлар раҳбарлари, ҳудудий бош бошқарма ҳамда бўлим бошлиқлари иштирокида кенгайтирилган йиғилиш бўлиб ўтди.
2024-07-22 20:40:00 / Вазирлик янгиликлари
Хабар берганимиздек, Камбағалликни қисқартириш ва бандлик вазирлигида марказий аппарат, вазирлик ҳузуридаги ташкилотлар раҳбарлари, ҳудудий бош бошқарма ҳамда бўлим бошлиқлари иштирокида кенгайтирилган йиғилиш бўлиб ўтди.
Унда бўш иш ўринларини аниқлаш ҳамда аҳоли бандлигини таъминлаш, ишсиз фуқароларни касб-ҳунарга ўқитиш, ҳамюртларимизни вақтинча ишлаш учун хорижга юбориш ҳамда ходимларнинг меҳнат ҳуқуқлари ва меҳнат муҳофазасини таъминлаш йўналишларида олиб борилаётган ишлар танқидий таҳлил қилиниб, келгусидаги устувор вазифалар белгилаб олинди.
Қайд этилганидек, мамлакатимизда аҳоли бандлигини таъминлаш бўйича олиб борилган ишлар натижасида меҳнатга лаёқатли аҳоли ўртасида ишсизлик даражаси йил бошидаги 6,8% дан 5,9% га камайган. Худди шу каби бошқа йўналишларда ҳам ижобий натижалар қўлга киритилиши баробарида камчиликларга ҳам йўл қўйилган.
Хусусан, йиғилишда Чилонзор, Миробод, Зангиота, Тошлоқ, Асака туманлари, Наманган, Андижон, Фарғона, Навоий, Чирчиқ, Ангрен шаҳарларидаги мавжуд бўш иш ўринларига фуқароларни ишга жойлаштириш кўрсаткичлари жуда паст эканлиги жиддий танқид қилинди.
Туман (шаҳар) бандлик бўлимларида фуқаролар билан тўғридан-тўғри ишлаш жараёнларини соддалаштириб, тизимга рақамлаштиришни кенг жорий этиш бўйича топшириқлар берилди.
Йиғилишда ишсиз аҳолини касб-ҳунарга ўқитиш юзасидан олиб борилаётган ишлар ҳам кўриб чиқилди. Қайд этилганидек, жорий йилнинг 6 ойида 113 минг ишсиз аҳоли ўқишга жалб этилиб, ўтган йилнинг мос даврига нисбатан 1,5 баравар ошган. Ютуқлар билан бир қаторда мавжуд камчиликлар ҳам санаб ўтилди. Айни йўналишда эскича қараш ва шу асосда ишга ёндашув сақланиб қолаётгани кескин танқид қилиниб, тизим мутасаддилари олдига замонавий фикрлаб, бозор иқтисодиёти талаб қилаётган касб-ҳунарларга ишсиз аҳолини ўқитиш бўйича топшириқлар берилди. Масъуллар қаттиқ огоҳлантирилди.
Жорий йилнинг ўтган даврида хорижга вақтинча ишга юбориш бўйича ҳам салмоқли ишлар қилинган, мамлакатлар географияси ривожланган давлатлар ҳисобига кенгайган. Хусусан, 2024-йилнинг 6 ойида 64 минг хорижда ишлаш истаги бўлган шахслар чет давлатларга ташкилий ишга жойлаштирилди. Бу ўтган йилнинг мос даврига нисбатан 3 бараварга кўп.
Бироқ, айрим йўналишларда сусткашликларга йўл қўйилган. Шу боис белгиланган режа-кўрсаткичлар бажарилишига панжа ортидан қараётган мутасаддилар фаолиятига салбий баҳо берилди. Камчиликларни зудлик билан бартараф этиш лозимлиги қайд этилди.
Аҳолининг меҳнат ҳуқуқлари ва меҳнат муҳофазасини таъминлаш йўналишида олиб борилаётган ишлар ҳам таҳлил қилинди. Таъкидланганидек, жорий йилнинг 6 ойида Камбағалликни қисқартириш ва бандлик вазирлиги ҳузуридаги Давлат меҳнат инспекцияси томонидан ўтказилган назорат тадбирларда 7 мингдан ортиқ фуқарога 32 млрд сўм иш ҳақи ундириб берилган. Ноқонуний ишдан бўшатилган 1 000 нафар шахс ишга тикланган.
Йиғилишда инспекция фаолиятини янада жонлантириш, ишчи-хизматчиларнинг ҳақ-ҳуқуқларини таъминлаш, меҳнат муҳофазасини кучайтириш лозимлиги алоҳида қайд этилди.
Кенгайтирилган йиғилиш якунида ҳудудий бош бошқармалар бошлиқлари ҳисоботлари эшитилиб, таклифлари тингланди.