Бугун Камбағалликни қисқартириш ва бандлик вазири Беҳзод Мусаев Германия Федератив Республикаси Меҳнат ва ижтимоий масалалар вазири ўринбосари, парламент аъзоси Анетте Крамме билан учрашди.
2024-07-15 22:00:00 / Вазирлик янгиликлари
Учрашувда Ўзбекистон фуқаролари учун бериладиган ишчи виза олиш тартибини соддалаштириш, вақтинча ишларга жойлашаётган ҳамюртларимизга ҳар томонлама қулайлик яратиш мақсадида оила аъзоларининг ҳам Германияга боришлари учун имкониятлар яратиш, улар учун “Ишонч телефони”ни ташкил этиш ҳамда меҳнат инспекцияси соҳасида ҳамкорликни йўлга қўйиш ва кадрлар малакасини ошириш масалалари муҳокама қилинди.
Мулоқотда Ўзбекистонда "Аусбилдунг" тизимини ривожлантириш ҳамда мазкур ўқув дастури учун "Ишга марҳамат" мономарказларида алоҳида хоналар ажратиш масалалари ҳам муҳокама қилинди. Қайд этилганидек, Германиянинг Ўзбекистондаги элчихонаси кўмагида моддий-техник базани мустаҳкамлаш учун қатор немис компаниялари жалб этилади.
Шунингдек учрашувда жорий йилнинг май ойида Камбағалликни қисқартириш ва бандлик вазирлиги делегациясининг Германияга амалга оширган хизмат сафари давомида эришилган келишувларни ҳаётга татбиқ этиш механизмлари ҳам кўриб чиқилди.
Қайд этиш керакки, бугунги кунда Германия билан меҳнат миграцияси, касб-ҳунарга тайёрлаш ва немис тилини ўргатиш соҳаларида истиқболли лойиҳалар амалга оширилмоқда.
Мулоқот давомида Анетте Крамме Тошкент шаҳридаги “Ишга марҳамат” мономаркази фаолияти билан яқиндан танишгани ва ижобий таассуротлар олгани, айниқса у ерда немис тилини ўргатиш жуда яхши йўлга қўйилганини алоҳида қайд этди. Шунингдек, "Миграция ва мобиллик" ҳукуматлараро битим лойиҳаси бўйича ҳамкорликдаги ишларни юқори баҳолади.