Сеулдаги навбатдаги учрашувлар Корея Республикаси Қурилиш уюшмаси раҳбари ҳамда Корея Хорижий саноат ишчилари миллий иттифоқи раиси билан бўлиб ўтди.
2024-05-06 19:15:00 / Вазирлик янгиликлари
Уюшма таркибида бугунги кунда 57 000 та қурилиш компанияси бор. Учрашувда асосий эътибор йирик қурилиш компанияларидаги мавжуд бўш иш ўринларига юртимиздан ишчиларни жалб қилиш масаласига қаратилди.
Уюшма раҳбари Пек Кван Бе Корея ўзбекистонлик мутахассислар билан ишлашга хоҳиши баланд эканини алоҳида қайд этди. Таъкидланганидек, ҳозирда Корея саноати ва қурилиш соҳасига тахминан 232 000 та ишчи ўрни етишмаяпти. Ундан қурилиш йўналишида айни пайтда 17 000 та ишчига эҳтиёж бор. Яқин йилларда бу кўрсаткич йилига 20 000 тага етади.
Учрашувда Ўзбекистонда мутахассисларни Корея қурилиш технологиялари асосида биргаликда тайёрлаш борасида ҳам фикр алмашилди. Бу борада Корея бандлик вазирлиги билан ҳам музокаралар ўтказилиши таъкидланди.
Корея Хорижий саноат ишчилари миллий иттифоқи раиси билан бўлиб ўтган мулоқотда асосий эътибор ушбу давлатда мавсумий иш ўринларига бўлган талаб ва уни қоплаш масаласига қаратилди. Тўсиқ бўлаётган мавжуд муаммолар муҳокама қилинди. Уларни ечиш йўллари ўртага ташланди.
Хорижий саноат ишчилари миллий иттифоқи раиси алоҳида қайд этдики, ўтган йилги ҳисоб-китобларга кўра мавсумий ишларга 400 000 та талаб аниқланган. Шундан жалб қилинган.
Бу ерда хорижий ишчиларнинг ҳам масъулиятини ошириш кераклигига тўхталиб ўтилди. Чунки, иш жойини ташлаб кетиш, тез-тез алмаштириш каби ҳолатлар содир бўлган.
Айтиш керакки, ҳозирги вақтда Кореядаги мавсумий ишларга ўзбекистонликлар жалб қилинмайди, ушбу хизмат сафари давомида Камбағалликни қисқартириш ва бандлик вазири Корея Республикасининг Меҳнат ва Адлия вазирликларида ҳам учрашувлар ўтказиши режалаштирилган.
Улар билан бўладиган мулоқотда асосий эътибор ишчи визаларини олиш жараёнини соддалаштириш, квоталарни ошириш, ишчиларни биргаликда тайёрлаш, янги йўналишларни очиш каби масалаларга эътибор қаратилади.