Xorezmniń jańa kelbeti: Rawajlanıw jolında taslanǵan strategiyalıq qádemler

Sonday-aq, bir qatar jańa joybarlardı iske qosıw hám qurılısına start beriw máresiminde qatnastı.

Sońǵı jıllarda Xorezm oazisine kelip atırǵan miymanlar aǵımı bir neshe esege arttı. Turistlik potencialdı iske qosıwǵa qaratılǵan baslamalar sheńberinde xalıqaralıq standartlarǵa juwap beretuǵın transport-logistika infrastrukturası jaratılıp atırǵanı itibarǵa ılayıq.

Atap aytqanda, Úrgensh xalıqaralıq aeroportında rásmiy delegaciyalarǵa xızmet kórsetetuǵın terminal qurılıp, jańa aerodrom kompleksin rekonstrukciyalawdıń birinshi basqıshı jedel dawam ettirilmekte.

Prezident Shavkat Mirziyoevtiń Xorezm wálayatına saparı mine, usı joybarlar menen tanısıwdan baslandı.

Aeroport 1960-jılı iske qosılǵan. Oǵan 1992-jılı xalıqaralıq status berilgen. Ulıwma maydanı 285 gektardan aslamdı quraytuǵın bul kompleks ótken jıllar dawamında mıńlaǵan jolawshıǵa xızmet kórsetip keldi. Búgingi kúnde aeroport arqalı onǵa shamalas abıraylı aviakompaniya tárepinen turaqlı qatnawlar jolǵa qoyılǵan. Usı jıldıń ózinde aeroport tárepinen jámi 126 milliard sumlıq xızmetler kórsetilip, bul kórsetkish 2025-jıldıń sáykes dáwirine salıstırǵanda 31 procentke ósti.

Jedel rawajlanıp atırǵan zaman, turistlerdiń artıp baratırǵan aǵımı hám xalıqaralıq birge islesiw kólemi bar quwatlıqlardı túp-tiykarınan keńeytiwdi kún tártibine qoymaqta.

Úrgensh xalıqaralıq aeroportın keńeytiw hám modernizaciyalaw ushın jámi 264 million dollar muǵdarında investiciya qarjıları qaratılǵan. Joybar mámleketlik-jeke menshik sheriklik tiykarında ámelge asırılmaqta.

Joybardıń jeke menshik sherigi sıpatında dúnyanıń eń aldınǵı, joqarı texnologiyalı hám abıraylı aviaciya xablarınan birin basqaratuǵın Qubla Koreyanıń “Incheon International Airport Corporation” kompaniyası tartıldı.

Prezidentimiz Xiywa hám Úrgensh qalaları iri xalıqaralıq sammitler, joqarı dárejedegi diplomatiyalıq ushırasıwlar, abıraylı ekonomikalıq hám mádeniy ánjumanlar ótkeriletuǵın global maydanǵa aylanıp atırǵanın atap ótti. Bunday ilajlarǵa keletuǵın sırt el delegaciyaları ushın joqarı dárejedegi qolaylıq hám qáwipsizlikti támiyinlew mámlekettiń xalıqaralıq maydandaǵı abırayına tikkeley xızmet etetuǵını atap ótildi.

Rekonstrukciyalaw sheńberinde aeroportta “Boeing 747” hám “Airbus A350” sıyaqlı keń fyuzelyajlı hawa kemelerin biymálel qabıl etiw imkaniyatı jaratılmaqta. Bul endi dúnyanıń túrli kontinentlerinen Xorezmge tikkeley, tranzitsiz uzaq aralıq párwazlardı ámelge asırıw imkaniyatın beredi.

Sonday-aq, rekonstrukciya jumıslarınıń birinshi basqıshında 18 hawa kemesi turatuǵın orın hám jańa burılıs jolı qurıp pitkeriledi. Bunnan tısqarı, aeroportta zamanagóy shegara qadaǵalawı hám viza bólimleri, ıqsham biznes-zal, hár qıylı sawda hám awqatlanıw shaqapshaları, kúni-túni isleytuǵın medicina punkti jáne dúnya brendlerin jámlegen “Duty free”zonası shólkemlestirilmekte.

Joybar juwmaqlanǵannan soń, jolawshılarǵa xızmet kórsetiw quwatlılıǵı saatına 300 den 1 mıń 300 ge shekem artadı.
Bunnan soń Prezident Shavkat Mirziyoev Úrgensh rayonındaǵı “Tillo domor” kárxanasınıń jańa óndirislik kompleksinde sútti qayta islew hám tayar ónim islep shıǵarıw procesin kózden ótkerdi.

Elimizde sharwashılıqtı rawajlandırıw, awıl xojalıǵı ónimlerin tereń qayta islew hám azıq-awqat sanaatında qosımsha qun shınjırın keńeytiwge ayrıqsha itibar qaratılmaqta. Bul baǵdarda zamanagóy texnologiyalardı engiziw, jergilikli shiyki zattı qayta islew hám islep shıǵarıwshılardı qollap-quwatlaw boyınsha keń imkaniyatlar jaratılǵan.

Xorezm wálayatı sút jetistiriw potencialı joqarı aymaqlardan biri. Bul imkaniyattan nátiyjeli paydalanıp, sharwashılıqtı qánigelestiriw hám sútti sanaat usılında qayta islewdi keńeytiw boyınsha joybarlar ámelge asırılmaqta.

“Tillo domor” kárxanasınıń ulıwma bahası 11 million dollar bolıp, jılına derlik 100 milliard sumlıq ónim islep shıǵarıw quwatlılıǵına iye. Kárxana Bolgariyadan alıp kelingen zamanagóy texnologiyalıq úskeneler menen támiyinlengen.

Bul jerde sır, qaymaq, smetana, tvorog, qatıq, sıyaqlı 70 ten aslam túrdegi sút ónimleri islep shıǵarılmaqta. Shiyki zat hár kúni 100 den aslam fermer xojalıǵı hám xalıqtan satıp alınadı. Bul, óz gezeginde, sharwashılıq penen shuǵıllanıp atırǵan xalıq ushın turaqlı satıw bazarın jaratıwǵa xızmet etpekte.

Kárxanada 120 jumıs ornı jaratılǵan. Óndiris kompleksinde 100 kilovatt quwatlılıqqa iye quyash panelleri de ornatılǵan. Keleshekte jáne 100 jańa jumıs ornın shólkemlestiriw, ónim túrlerin kóbeytiw rejelestirilgen.

Búgingi kúnde wálayatta 1 mıń 200 ge shamalas qayta islew kárxanası jumıs alıp barmaqta.

Prezidentimiz jergilikli shiyki zattı tereń qayta islep, joqarı qosımsha qunlı ónimler islep shıǵarıwdı kóbeytiw, bunday kárxanalardı shiyki zat penen turaqlı támiyinlew, ónim túrlerin hám óndiris kólemin arttırıw áhmiyetli ekenligin atap ótti. Juwapkerlerge bul baǵdardaǵı isbilermenlik baslamaların qollap-quwatlaw boyınsha tiyisli kórsetpeler berildi.

Soń Prezident Shavkat Mirziyoev Úrgensh qalasındaǵı Xorezm aldıńǵı kásiplik sheberlik texnikumı hám onıń aymaǵında shólkemlestirilgen Kásipler qalashasına bardı.

Elimizde miynet bazarınıń talaplarına sáykes, zamanagóy bilim hám ámeliy kónlikpelerge iye orta buwın qánigelerin tayarlawǵa ayrıqsha itibar qaratılmaqta. Bul baǵdarda kásiplik bilimlendiriwdi jumıs beriwshilerdiń talabı menen úylestiriw, aldınǵı sırt el tájiriybesin engiziw hám dual bilimlendiriwdi keńeytiw boyınsha sistemalı jumıslar ámelge asırılmaqta.

Úrgensh qalasında shólkemlestirilgen Xorezm aldıńǵı kásiplik sheberlik texnikumı áne usı maqsetlerge xızmet etedi. Mákemeni qurıw ushın mámleketlik byudjetten 72,4 milliard sum ajıratılǵan. 5,2 gektar maydanda 1 mıń 100 orınǵa mólsherlengen eki oqıw imaratı, 300 orınǵa iye jataqxana, sport zalı, 200 orınǵa iye asxana jáne zamanagóy úskenelengen eki oqıw ustaxanası qurılǵan.
Texnikumda Germaniya, Shveycariya, Ullı Britaniya, Qıtay hám Qubla Koreyanıń aldınǵı bilimlendiriw baǵdarlamaları tiykarında oqıtıw jolǵa qoyılǵan. Dual bilimlendiriw sisteması teoriyalıq bilimlerdi tikkeley óndirislik ámeliyat penen baylanıstırıw imkaniyatın beredi.

2026-2027-oqıw jılı ushın 11 kásip baǵdarı boyınsha 200 qábiletli jas imtixan tiykarında tańlap alınǵan. Bilimlendiriw procesi jumıs beriwshiler menen birgelikte shólkemlestirilip, pitkeriwshilerdiń iyelegen kásibi boyınsha jumıs penen támiyinleniwine ayrıqsha itibar qaratılmaqta.

Texnikum Xorezm wálayatındaǵı basqa da professional bilimlendiriw mákemeleri ushın zamanagóy ámeliy baza wazıypasın atqaradı. Aymaqtaǵı bilimlendiriw mákemeleriniń derlik 4 mıń 300 oqıwshısı bul jerdegi ustaxana hám laboratoriyalarda ámeliyat óteydi. Bunday aldınǵı kásiplik sheberlik texnikumların Qaraqalpaqstan Respublikası hám basqa da aymaqlarda basqıshpa-basqısh shólkemlestiriw rejelestirilgen.

Mámleketimiz basshısı mákeme aymaǵındaǵı Kásipler qalashasın da kózden ótkerdi. Bul jerde jaslardıń qızıǵıwshılıǵı hám qábiletin erte anıqlaw, olardı belgili bir kásiplerge baǵdarlaw ushın sharayat jaratılǵan.

Kásipler qalashasında “Óziń soǵıp kór” principi tiykarında oqıwshılar hár qıylı zamanagóy úskeneler menen tikkeley islep, ámeliy kónlikpeler payda etedi. Transport hám logistika, sanaat hám qurılıs, servis, awıl xojalıǵı hám “jasıl” energetika sıyaqlı miynet bazarında talap joqarı bolǵan baǵdarlar qamtıp alınǵan.

Kompleks iri jumıs beriwshi kárxanalar menen birgelikte jumıs alıp baradı. Bul jaslardı kásipke baǵdarlawdan baslap, olarǵa ámeliy kónlikpe beriw hám keleshekte bántligin támiyinlewge shekemgi bolǵan birden-bir sistemanı qáliplestiriwge xızmet etedi.
Prezidentimiz jaslardı zamanagóy miynet bazarı talap etip atırǵan kásiplerge sapalı oqıtıw, bilimlendiriw baǵdarlamaların jumıs beriwshilerdiń talabına beyimlestirip barıw hám bunday tájiriybeni basqa aymaqlarda da keńeytiw áhmiyetli ekenligin atap ótti.
Prezident Shavkat Mirziyoev Úrgensh xalıqaralıq aeroportı hám Xiywa temir jol stanciyasın baylanıstıratuǵın jańa temir jol liniyası menen tanıstı.

Elimizde transport infrastrukturasın rawajlandırıw, hár qıylı transport túrlerin óz-ara baylanıstırıw, xalıq hám turistler ushın qolaylı qatnaw sistemasın jaratıwǵa ayrıqsha itibar qaratılmaqta. Xorezm wálayatında ámelge asırılǵan bul joybar da usı maqsetlerge xızmet etedi.

Bahası 225 milliard sum bolǵan joybar sheńberinde Úrgensh xalıqaralıq aeroportı hám temir jol vokzalın baylanıstıratuǵın 11 kilometrlik jańa temir jol liniyası qurıldı. Onda bir bándirgi, kópir, avtomobil jolları menen kesilispeler hám 25 suw ótkeriw qurılması qurıldı.

Jańa jónelis arqalı jılına derlik 650 mıń jergilikli hám sırt elli turistti tasıw imkaniyatı jaratıldı. Xiywa hám Úrgensh arasındaǵı qatnaw waqtı eki esege qısqarıp, 80 minuttan 40 minutqa túsedi. 30 ǵa shamalas jańa jumıs ornı shólkemlestirildi.

Itibarlı tárepi, aeroport hám temir joldı tikkeley baylanıstıratuǵın bunday joybar mámleketimizde birinshi márte ámelge asırıldı. Úrgensh xalıqaralıq aeroportı – Xiywa jónelisinde Qıtayda islep shıǵarılǵan CR200J elektropoezdınıń qatnawı jolǵa qoyılmaqta.
Altı vagonnan ibarat bul elektropoezd bir waqıttıń ózinde derlik 400 jolawshını tasıw imkaniyatına iye. Ol saatına 160 kilometrge shekem tezlikte háreketlenedi. Vagonlarda VIP, biznes hám ekonom-klass orınları, biypul Wi-Fi, elektron qurılmalardı zaryadlaw imkaniyatı, zamanagóy kondicioner hám ısıtıw sistemaları bar. Mayıplıǵı bolǵan shaxslar ushın da zárúr sharayatlar jaratılǵan.
Mámleketimiz basshısı jańa elektropoezdda Xiywa qalasına keldi.

Xiywada Prezidentimiz Úrgensh xalıqaralıq aeroportı hám Xiywa temir jol vokzalın baylanıstıratuǵın jóneliste qatnawǵa qoyılatuǵın jańa trolleybuslardı da kózden ótkerdi.

Bıyıl iyul ayında Qıtaydan alıp kelingen 10 trolleybus zamanagóy avtonom háreketleniw sisteması menen úskenelengen bolıp, elektr tarmaǵına jalǵanbaǵan halda da 100 kilometrge shekem jol júre aladı.

Hár bir trolleybus 87 jolawshıǵa mólsherlengen. Olarda mayıplıǵı bolǵan shaxslar, kekseler hám balalı jolawshılar ushın qolaylıqlar, USB hám Type-C portları, ishki hám sırtqı baqlaw kameraları ornatılǵan. Sonday-aq, aydawshınıń jaǵdayın baqlaw, joldan shıǵıp ketiwden eskertiw hám avtomatikalıq órt óshiriw sıyaqlı qáwipsizlik sistemaları bar.

Usı zamanagóy transport quralların alıp keliw baslaması Prezidentimizdiń ótken jılǵı Xorezm wálayatına saparı dawamında alǵa qoyılǵan edi.

Mámleketimiz basshısı transport túrlerin óz-ara úylestiriw xalıq hám turistler ushın qolaylılıq jaratıw, jolǵa ketetuǵın waqıttı qısqartıw hám aymaqtıń turistlik tartımlılıǵın arttırıwǵa xızmet etetuǵının atap ótti. Juwapkerlerge jolawshılar ushın qáwipsiz hám sapalı xızmet kórsetiwdi támiyinlew boyınsha tiyisli kórsetpeler berildi.

Prezident Shavkat Mirziyoev Xiywa qalasında shólkemlestirilgen Lyaonin pedagogikalıq universitetiniń Ózbekstandaǵı filialı hám Konfuciy institutınıń jumısı menen de tanıstı.

Elimizde joqarı bilimlendiriwdi xalıqaralıq standartlar tiykarında rawajlandırıw, sırt eldegi abıraylı universitetler menen birge islesiwdi keńeytiw hám zamanagóy baǵdarlarda maman kadrlar tayarlawǵa ayrıqsha itibar qaratılmaqta.

Joqarı bilimlendiriw, ilim hám innovaciyalar ministrligi, Ábiw Rayxan Beruniy atındaǵı Úrgensh mámleketlik universiteti hám Qıtaydıń Lyaonin pedagogikalıq universiteti menen birgelikte ámelge asırılǵan joybar sheńberinde jańa bilimlendiriw kompleksi qurıldı. Onı qurıw hám úskenelew ushın mámleketlik byudjetten 140 milliard sum qarjı ajıratıldı. Bul jerde 120 jańa jumıs ornı jaratıldı.

Komplekste 560 orınlıq oqıw blokları, kitapxana, sport zalı, 200 orınlıq mádeniyat sarayı hám 118 orınlıq asxana bar. Ekinshi tórt qabatlı imaratta 628 orınlıq auditoriyalar hám 224 orınlıq studentler turaq jayı shólkemlestirilgen.

2026-jıl ushın qabıllaw kvotası 160 etip belgilengen. Keleshekte jıllıq qabıllawdı 500 ge, al studentler sanın 2 mıńǵa jetkeriw rejelestirilgen.

Bilimlendiriw kúndizgi hám aralıqtan turıp, ózbek, qıtay hám inglis tillerinde alıp barıladı. Bakalavriat basqıshında “Xalıqaralıq qıtay tili tálimi”, “Turizm basqarıwı”, “Xalıqaralıq biznes”, “Jasalma intellekt”, magistraturada bolsa “Qıtay tili hám mádeniyatın oqıtıw metodikası”, “Bilimlendiriw basqarıwı”, “Jasalma intellekt hám bilimlendiriw texnologiyaları” baǵdarlarında kadrlar tayarlanadı.

Filialdıń diplomı Ózbekstanda tikkeley tán alınadı. Qábiletli pitkeriwshilerge Qıtaydıń jetekshi joqarı bilimlendiriw mákemelerinde grant tiykarında oqıwdı dawam ettiriw hám abıraylı shólkemlerde stajirovka ótew imkaniyatı jaratıladı.

Búgingi kúnde Xorezm wálayatında qıtaylı investorlardıń qatnasıwında ulıwma bahası 2 milliard 343 million dollarlıq 38 iri joybar ámelge asırılmaqta. Olarda zamanagóy texnologiyalar hám qıtay tilin jaqsı biletuǵın joqarı mamanlıqtaǵı qánigelerge talap joqarı. Jańa bilimlendiriw mákemesi hám Konfuciy institutı mine, usı talapqa say kadrlar tayarlawǵa xızmet etedi.

Prezidentimiz bilimlendiriw baǵdarlamaların ekonomika hám miynet bazarınıń talapları menen úylestiriw, studentlerdiń zamanagóy texnologiyalardı hám shet tillerin puqta iyelewi ushın barlıq sharayatlardı jaratıw áhmiyetli ekenligin atap ótti.
Usı jerdiń ózinde mámleketimiz basshısına birden-bir milliy turizm platforması jáne turizm tarawında isbilermenler ushın jaratılıp atırǵan jańa imkaniyatlar menen jeńillikler tanıstırıldı.

Sońǵı jılları Xorezm wálayatın kompleksli rawajlandırıw, ekonomika tarmaqların diversifikaciyalaw, isbilermenlik hám investiciyalıq ortalıqtı jaqsılaw boyınsha keń kólemli jumıslar ámelge asırıldı.

Sońǵı toǵız jılda joqarı dáramatlı jumıs orınların jaratıw ushın wálayatqa 7,5 milliard dollarlıq investiciya kirgizildi, 9,7 mıń jańa quwatlıq iske qosıldı. Kishi hám orta biznes joybarları ushın 33 trillion sumnan aslam kreditler ajıratıldı.

Nátiyjede xalıqtıń real dáramatları 2 esege arttı. Sanaat hám qurılısta bánt bolǵanlardıń úlesi 18 procentke, xızmetler tarawında 55 procentke jetti. Kámbaǵallıq dárejesi 4,4 procentke tústi, jumıssızlıq 2 esege qısqarıp, 4,5 procentti quramaqta. 72 máhálle “jumıssızlıq hám kámbaǵallıqtan jıraq” aymaqqa aylandı.

Wálayattıń transport hám turizm infrastrukturası da basqıshpa-basqısh jańalanbaqta. Sońǵı toǵız jılda 280 miymanxana hám miyman úyi qurılıp, miymanxana fondı 4 esege arttı, 11 jańa turizm ornı iske qosıldı. Keyingi bes jılda sırt el turistleriniń sanı 10 esege kóbeydi.

Xiywa qalasındaǵı “Farovon Khiva Hotel” miymanxanasında Prezidentimizdiń qatnasıwında Xorezm wálayatındaǵı jańa joybarlardı iske qosıw hám perspektivalı baslamalardıń qurılısına start beriw máresimi bolıp ótti.

– Jańa Ózbekstandaǵı reformalarımızdıń dáslepki kúnlerinen baslap jańa jumıs orınların jaratıw hám zamanagóy quwatlıqlardı iske qosıwdı tiykarǵı baǵdar sıpatında belgilep alǵanbız. Usı maqsette Xorezm wálayatı boyınsha da ayrıqsha baǵdarlama hám qararlardı tastıyıqlap, qarjısın da, juwapkerlerin de anıq belgilep, jumıslardı shólkemlestirip atırmız, – dedi mámleketimiz basshısı.

Eger 2016-jılı Xorezm wálayatına tek ǵana 30 million dollarlıq sırt el investiciyası tartılǵan bolsa, 2026-jılı bul kórsetkish 2 milliard dollardan artpaqta.

Jıl basınan berli Úrgensh hám Xiywa qalaları, Topıraqqala hám Úrgensh rayonlarında ximiya, mashina qurılısı, qurılıs materialları hám turizm baǵdarlarında jańa joybarlar ushın zárúr sharayatlar jaratıldı. Sanaat ushın 195 gektar jer maydanınıń kategoriyasın ózgertiw, elektr hám jol infrastrukturasın jaqsılaw ushın 100 milliard sum qarjı ajıratıw máseleleri sheshildi.

Sonday-aq, Ǵárezsizlik bayramı qarsańında Úrgensh xalıqaralıq aeroportınan Xiywaǵa shekem elektrlestirilgen temir jol liniyası paydalanıwǵa tapsırıldı. Úrgensh – Xiywa tólemli avtomobil jolı da iske qosılmaqta. Bul mámleketimizdegi birinshi tólemli avtomobil jolı boladı. Ol arqalı Úrgenshten Xiywaǵa jetip barıw waqtı 45 minuttan 20 minutqa qısqaradı.

– Bul jumıslarımızdıń dawamı sıpatında búgin sizler menen 176 million dollarlıq 12 joybardı iske qosamız. Sonday-aq, sırt elli sheriklerdiń qatnasıwında qurılatuǵın 7 milliard 424 million dollarlıq 15 jańa quwatlılıq qurılısına start beremiz,-dedi Prezident.
Sonıń ishinde, Topıraqqala rayonında Birlesken Arab Ámirliklerinen birge islesiwshiler menen ulıwma bahası 6 milliard dollarlıq ekologiyalıq aviaciya janılǵısın islep shıǵarıw joybarı ámelge asırıladı. Joybarǵa Qıtaydıń “Sinopec” kompaniyası tartılǵan bolıp, jer maydanın tayarlaw hám joybar hújjetlerin islep shıǵıw jumısları baslanǵan.

Slovakiyalı birge islesiwshiler menen 5 mıń gektar qumlı jerdi ózlestiriw hám 170 million dollarlıq bioetanol islep shıǵarıw kárxanasın shólkemlestiriw rejelestirilgen. Házirdiń ózinde 1,5 mıń gektar maydanda ámeliy jumıslar baslanǵan.

Úrgensh qalasında yaponiyalı birge islesiwshiler menen 30 million dollarlıq 250 orınlıq miymanxana hám sawda-kewilashar kompleks qurılmaqta. Onı 2027-jılı tolıq iske qosıw rejelestirilgen.

Saudiyalı birge islesiwshi menen wálayat orayında zamanagóy qazanxana qurılıp, 183 kóp qabatlı turaq jay hám 37 sociallıq obektti ıssılıq hám elektr energiyası menen támiyinlew quwatlıqları jaratıladı. Túrkiyalı birge islesiwshiler menen mámleketlik-jeke menshik sheriklik tiykarında oftalmologiya klinikası shólkemlestiriledi.

Úrgensh rayonında koreyalı investorlardıń qatnasıwında respublikada birinshi márte shıǵındılardı jabıq cikl tiykarında qayta islep, 71 megavatt “jasıl” energiya islep shıǵarıw joybarı ámelge asırıladı. Oǵan 100 million dollar investiciya kirgiziledi.

Sonday-aq, Xiywa qalasına tutas 26 gektar maydanda 120 million dollarlıq “Sahro yulduzi” zamanagóy turistlik kompleksi, Úrgensh rayonında 26 million dollarlıq mıs sanaatı klasteri hám 60 million dollarlıq optikalıq talshıqlı kabellerdi islep shıǵarıw kárxanası qurıladı.

Al-Xorezmiy qalashasında 5 mıń studentke mólsherlengen zamanagóy universitet, miymanxana, dem alıw hám sawda kompleksleri, Úrgensh qalasında bolsa “Investorlar úyi” imaratı qurıladı.

Ulıwma, usı joybarlar nátiyjesinde 6,6 mıń jańa jumıs ornınıń jaratılıwı názerde tutılǵan.

Mámleketimiz basshısı bul joybarlardı ámelge asırıwda qatnasıp atırǵan sırt elli birge islesiwshiler hám jámiyetshilik wákillerine minnetdarshılıq bildirdi.

Prezident rámziy túymeni basıp, jańa joybarlardı iske qostı hám qurılıs jumıslarına start berdi. Investorlar hám belsendiler menen qızǵın sóylesiw bolıp ótti.

Mámleketimiz basshısı Xiywa qalasında qurılısı rejelestirilgen xalıqaralıq turistlik qalasha joybarınıń prezentaciyası menen tanıstı.

Sońǵı jılları Xorezm wálayatında turizm infrastrukturasın rawajlandırıw, turistlerge zamanagóy xızmetler kórsetiw hám olardıń aymaqta qalıw múddetin sozıwǵa ayrıqsha itibar qaratılmaqta. Keyingi toǵız jılda wálayatta 280 miymanxana hám miyman úyi qurılıp, miymanxana fondı 4 esege arttı, 11 jańa turizm ornı iske qosıldı. Sońǵı bes jılda sırt el turistleriniń sanı 10 esege kóbeydi.
Jańa turistlik qalasha tariyxıy miyras hám zamanagóy qala qurılısı sheshimlerin úylestirgen halda qurıladı. Onıń arxitekturalıq koncepciyasın islep shıǵıwda Xorezmniń kóp ásirlik qala qurılısı dástúrleri, sonıń ishinde, 1511-jılı Xiywa xanlıǵınıń dáslepki paytaxtı bolǵan áyyemgi Vazir qalasınıń tariyxıy dúzilisi hám kósheler tarmaǵı tiykar etip alınǵan.

Ulıwma maydanı 12,3 gektar bolǵan komplekste miymanxanalar, tariyxıy hám zamanagóy eksponatlar kórsetiletuǵın muzey, milliy hám xalıqaralıq taǵamlar restoranları, sawda hám xızmet kórsetiw obektleri jaylasadı.

Aymaqtıń salmaqlı bólegi jasıl maydanlar hám seyil etiw jollarına ajıratıladı. Sarqırama fontanlar hám ishki salmalar shólkemlestiriledi. Avtomobil turıw orınlarında quyash panelleri ornatılǵan bastırmalardıń qurılıwı da názerde tutılǵan.
Atap ótilgenindey, Xorezmde transport-logistika hám turizm infrastrukturası izbe-iz rawajlanıp atırǵanı turistler aǵımınıń kóbeyiwine xızmet etpekte. Usı kózqarastan, zamanagóy turistlik komplekslerdi kóbeytiw, xızmetlerdiń túrin keńeytiw hám turistlerdiń aymaqta qalıw múddetin uzaytıw úlken áhmiyetke iye.

Jańa qalasha Ichan qalaǵa túsip atırǵan turistlik júkti azaytıw, turistler ushın jańa jónelis hám xızmetlerdi usınıs etiwge xızmet etedi. Joybar sheńberinde mıńlaǵan jańa jumıs orınlarınıń jaratılıwı, xalıq ushın avtomobiller háreketinen jıraq jasıl dem alıw aymaqlarınıń qurılıwı názerde tutılǵan.

Bunnan soń Prezident Shavkat Mirziyoev Xiywa qalasında jańadan qurılǵan Kongress-xoll, úsh juldızlı miymanxana hám “Xiywa Ichan qala” qabıllawlar úyiniń jumısı menen tanıstı.

Bul obektler mámleketimiz basshısınıń 2026-jıl 30-apreldegi tiyisli hújjeti tiykarında qurıldı. Olardıń iske qosılıwı nátiyjesinde derlik 2 mıń jańa jumıs ornın jaratıw, jılına 50 mıń turistke miymanxana xızmetin kórsetiw hám xızmetler eksportın 4 million dollarǵa jetkeriw maqset etilgen.

Zamanagóy premium usıl hám Xorezm milliy arxitekturası elementleriniń úylesimliliginde qurılǵan Kongress-xoll xalıqaralıq ánjumanlar, biznes-konferenciyalar, húkimetleraralıq sóylesiwler hám mádeniy forumlardı ótkeriw ushın mólsherlengen.
Ulıwma maydanı 1,9 gektar bolǵan kompleksti qurıw ushın 857 milliard sum byudjet qarjıları qaratılǵan. Átirapında keń jasıl aymaqlar hám parkler shólkemlestirilip, “Jasıl mákan” ulıwma milliy joybarı sheńberinde abadanlastırıw jumısları ámelge asırılǵan.

Kongress-xollǵa tutas aymaqta xalıqaralıq ánjumanlar qatnasıwshılarına hám turistlerge qolaylı sharayat jaratıw maqsetinde úsh juldızlı miymanxana da qurıldı. Bahası 169 milliard sum, ulıwma maydanı 1,6 gektar bolǵan joybar sheńberinde 60 jańa jumıs ornı jaratılǵan.

Tórt qabatlı miymanxanada 310 orınǵa mólsherlengen 156 xana, keń vestibyul, resepshn, restoran-bar, balalar bólmesi hám terassa bar. Sonday-aq, jabıq basseyn, fitnes hám vellness aymaqlarınan ibarat salamatlandırıw zonası shólkemlestirilgen.
Miymanxanadan Kongress-xoll imaratına, “Máńgi qala” tariyxıy-etnografiyalıq baǵına hám ónermentler rastalarına jasıl seyil etiw jolları arqalı piyada bir neshe minutta jetip barıw múmkin.

Mámleketimiz basshısı “Xiywa Ichan qala” qabıllawlar úyin de kózden ótkerdi. Ulıwma maydanı 2 gektar bolǵan bul kompleks rásmiy ilajlardı ótkeriw hám sırt el delegaciyaların qabıl etiwge mólsherlengen. Joybardıń bahası 260 milliard sumdı quraydı.
Imarat arxitekturasında Xorezmge tán sawlatlı aǵash oymakerligi ústinleri, ganchkerlik óneri, kók hám firuza reńli plitkalardan keń paydalanılǵan. Qabıllawlar úyi átirapında úlkeniń bay tariyxın sáwlelendiriwshi fotokórgizbeler hám milliy ónermentshilik ustaxanalarınıń jumısı jolǵa qoyılǵan.

Usı jerdiń ózinde mámleketimiz basshısı Xorezm wálayatı jámiyetshiliginiń wákilleri menen qızǵın sóylesti. Sóylesiwde sońǵı jılları wálayatta júz berip atırǵan úlken ózgerisler, adamlardıń turmıs tárizi hám sanasındaǵı jańalanıwlar haqqında sóz boldı. Áyyemgi Xorezm jerinde Jańa Ózbekstannıń dóretiwshilik, rawajlanıw hám jańalanıw ruwxı barǵan sayın ayqın kózge taslanıp atırǵanı atap ótildi. Wálayattıń bay tariyxı hám dástúrlerin qásterlep-saqlaǵan halda onı zamanagóy, abat hám abadan aymaqqa aylandırıw jolındaǵı jumıslar izbe-iz dawam ettiriletuǵını atap ótildi.

Prezident bul komplekslerden nátiyjeli paydalanıw, Xiywada iri xalıqaralıq ilajlardı kóbeytiw, turistlerge kórsetiletuǵın xızmetlerdiń sapasın arttırıw hám jańa jumıs orınların jaratıw boyınsha kórsetpeler berdi.

Prezident Shavkat Mirziyoevtiń Xorezm wálayatına saparı dawam etpekte.